ទេសចរធម្មជាតិកោះស្តេចកម្ពុជា បទកាគតិ ១២ ០១ ២០១៥

១​   ភ្នំពេញកោះកុង      តាមរថយន្តក្រុង       ជ្រៀកពុះព្រឹក្សា

     ឆ្លងកាត់ធម្មជាតិ     ជួរភ្នំបុព្វតា              ទេសភាពកម្ពុជា

                                បៃតងស្អាតណាស់  ។

២   ភ្នំពេញកោះកុង      តាមរថយន្តក្រុង      ឃើញភ្នំស្អេកស្កះ

     រថយន្តសរសៀរ      ឆ្លងព្រៃដ៏ក្រាស់        ភូមិឋានថ្មីចាស់

                                ពណ៌ចាំងដូចពេជ្រ   ។

៣   ភ្នំពេញកោះកុង     តាមរថយន្តក្រុង      ឆ្លងដល់កោះស្តេច

      ឆ្នេរសមុទ្រខ្មែរ       ទឹកថ្លាឆ្លុះខ្សាច់        ទេសភាពល្អផ្តាច់

                               នៅលើលោកា   ។

៤   ភ្នំពេញកោះស្តេច  ឆ្នេរស្រស់រំលេច       ទេសភាពជលសារ

     រថយន្តឆ្លងភ្នំ         ឃើញកោះនានា      ប៉ងភ្ជាប់កាយា

                               មកដែនសុវណ្ណភូមិ   ។

៥   ភ្នំពេញកោះស្តេច   ឆ្នេរកោះរំលេច        រលកពូនផ្តុំ

      រលេញកៀកកិត    សៀងស័ព្ទរណ្តំ       ប្រៀបតន្រ្តីភូមិ

                               ស្វាគមន៍ទេសចរ   ។

៦   ភ្នំពេញកោះស្តេច  ពន្លឺដូចពេជ្រ          ចាំងភ្លែកសែនល្អ

     រលករលេញ        ​ដេញតាមទេសចរ    សំលេងអ៊ូរអរ

                             ប្របឆ្នេរខ្សាច់មាស   ។

 ៧   ភ្នំពេញកោះស្តេច       សាគរពណ៌ពេជ្រ   ជំនោរសាយជះ

  ស្រោបកាយបរិសុទ្ធ  ម្លប់ដូងប៉ប្រះ     លោមលួងអោយផ្លាស់

                               ស្រស់ស្រាយអារម្មណ៍  ។

៨   ភ្នំពេញកោះស្តេច     កំសាន្តឆ្នេរខ្សាច់     ធម្មជាតិប្របភ្នំ

    ថ្មប៉ប្រះទឹក        មច្ឆាររេរាំ       កៀងគរស្វាគមន៍

                            ទេសចរឆ្ងាយជិត   ។

៩   កោះស្តេចសាគរ    ឆ្លងតាមអូបរ           កោះនៅកៀកកិត

     កោះងើបហួសទឹក  ហាក់នឹកដល់មិត្ត    មើលទៅសែនជិត

                             មិនឆ្ងាយឡើយណា  ។

១០  កោះស្តេចសាគរ   ឆ្លងតាមអូបរ         រំភើបចិន្តា

    កាត់រលកទឹក   ស្រូបខ្យល់ជលសារ  មើលក្រោយកាលណា

                          ឃើញឆ្នេរបៃតង   ។

១១  កោះស្តេចធម្មជាតិ   កោះធំពុះជ្រៀត   ជលសារថ្លាយ៉ង់

      ក្រោមម្លប់ព្រឹក្សា    ផ្កាព្រៃផូរផង់   ក្រម៉ុមភូមិផង

                             រីកលំអរកោះ   ។

 ១២  កោះស្តេចកោះស្នេហ៍  កំសាន្តតាមឆ្នេរ   រំដួលផ្កាភ្លោះ

     ផ្ការីកញញឹម   សាយមន្តសម្រស់    រំដួលដីកោះ

                          ឈ្មោះពីរោះក្រៃ  ។

១៣  កោះស្តេចដួងចិត្ត   កោះលាក់វមិត្ត   ក្នុងចិត្តកវី

      កោះលួចបេះដូង    អោយស្លុងស្មារតី  រំដួលកោះថ្មី

                             ក្រអូបម្លេះណា  ។

១៤  កោះស្តេចកោះស្នេហ៍  ផ្ការីកតាមឆ្នេរ  ក្លិនជាប់នាសារ

     ចងពង់ងូតទឹក   គ្របស្បៃក្រមា     ឃើញសាច់ម៉ត់ថ្លា

                            ឱរ៉ាក្តុកក្តួល   ។

១៥  កោះស្តេចលោមស្នេហ៍  ផ្កាសមុទ្រខ្មែរ  តោងចិត្តឆាបឆួល

      បេះដូងរន្ធត់    ប្រតិព័ទ្ធហាក់ដួល    សុដន់ក្លមមូល

                          ប្រៀបកោះទ្វេរហា   ។

១៦  កោះស្តេចលោមស្នេហ៍    ឆ្នេរសមុទ្រខ្មែរ  ប្រៀបកោះសួគា៌

      ដែនដីសុវណ្ណភូមិ     សុខដុមរមនា     ទេសចរជលសារ

                              លង់ស្នេហ៍អ្នកហើយ  ។

១៧  កោះស្តេចកម្ពុជា   ទឹកដីខេមរា   អមតៈរៀងអើយ

   ខ្មែរមិនចោលកោះ  កោះនៅកៀកកើយ  កោះនៅឆ្លងឆ្លើយ

                           កម្ពុជាអច្ឆរិយៈ   ៕

និពន្ធ និងរក្សាសិទ្ធដោយវេជ្ជបណ្ឌិត  ញូង ភក្តី  នៃមាតុភូមិបៃតងកម្ពុជា