១ សួស្តីឆ្នាំថ្មី រាស្ត្រខ្មែរប្រុសស្រី រីករាយស្វាគមណ៍
ទទួលទេវតា រក្សាឥន្ទ្រព្រហ្ម យាង្គមកជួបជុំ
ក្នុងក្រុងអង្គរ ។
២ សួស្តីឆ្នាំថ្មី ញាតិខ្មែរប្រុសស្រី រីករាយអបអរ
ប្រារពពិធី ផ្កាភ្ញីជូនពរ ជាតិខ្មែរយើងឈរ
ក្នុងសន្តិភាព ។
៣ សួស្តីឆ្នាំថ្មី យើងជុំសប្បាយ ក្អាកក្អាយដ៏រាប
ជុំញាតិសណ្តាន ក្រោមម្លប់ខ្ពស់ទាប វលិ ៍ក្រាស់លូនក្រាប
ប្រៀបខ្ទមមេឃា ។
៤ សួស្តីឆ្នាំថ្មី យើងខ្មែររីករាយ លៀងភោជនាហារ
អង្គរសង្ក្រាន្ត ឧធ្យានខេមរា ក្បែរស្ពានប្រាង្គប្រា
ឆ្លងស្ទឹងសៀមរាប ។
៥ សួស្តីឆ្នាំថ្មី យើងខ្មែរប្រុសស្រី សប្បាយគ្មានប្រៀប
យើងសើចយើងច្រៀង សំនៀងរាប់រៀប បាយឆ្ងាញ់បានជ្រាប
ផ្តល់ក្តីសង្ឃឹម ។
៦ សួស្តីឆ្នាំថ្មី រហាត់ក្នុងព្រៃ ហឬទ័យញញឹម
រហាត់កាត់ទឹក សន្ធឹកគ្រឹម ៗ សន្តំសន្សឹម
មនុស្សមនាទាំងឡាយ ។
៧ ឆ្នាំថ្មីក្សេមក្សាន្ត អង្គរសង្ក្រាន្ត ឧធ្យានចរណៃ
ជំនោរត្រជាក់ ផាត់ធ្លាក់ស្រោបកាយ លួងលោមថ្នមបី
ទេសចរឆ្ងាយជិត ។
៨ ឆ្នាំថ្មីក្សេមក្សាន្ត អង្គរសង្ក្រាន្ត ប្រារពនិមិត្ត
មួកស្លឹកត្នោតយក្ស ចងស្រាក់សមក្រិត កន្ត្រងយក្សពិត
ស្នាដៃខេមរា ។
៩ ឆ្នាំថ្មីក្សេមក្សាន្ត អង្គរសង្ក្រាន្ត បង្ហាញលោកា
ខ្មែរអាចកែឆ្នៃ អង្រុតយក្សា បំពង់ត្នោតតា
ក៍ធំទៀតផង ។
១០ ឆ្នាំថ្មីក្សេមក្សាន្ត អង្គរសង្ក្រាន្ត មើលល្បែងចត្រង្គ
ល្បែងទាញព្រ័ត្រយក្ស រាំម៉ាឌីហ្សូន នំអន្សមបីតោន
ប្លែកណាសឆ្នាំនេះ ។
១១ ឆ្នាំថ្មីក្សេនក្សាន្ត អង្គរសង្ក្រាន្ត យុវជនពិសេស
ការពារវប្បធម៌ បវរយើងនេះ មិនអោយរបេះ
របូតបង់ឡើយ ។
១២ ឆ្នាំថ្មីក្សេមក្សាន្ត សូមស្រុកសាន្តត្រាណ ដ៏រាបរៀងអើយ
ខ្មែរនឹងអភិវឌ្ឍន៍ ទ្រូងតឹងនឹងស្បើយ កូនខ្មែរយល់ហើយ
ជាតិគឺ បេះដូង ៕
និពន្ធដោយវេជ្ជបណ្ឌិត ញូង ភក្តី នៃមន្ទីរពេទ្យកុមារអង្គរ
