អាណាចក្រអាថ៌កំបាំងកោះកេរ្តិ៍ ខ្មែរ បទកាគតិ ០៤ ០២ ២០១៥

១   ព្រលឹមស្រាងភ្លាម       ក្រោកពីព្រហាម           ងូតទឹកដុសធ្មេញ

      តែងខ្លួនយ៉ាងស្អាត     ចិត្តស្បើយទោម្នេញ       ញញឹមបញ្ចេញ

                                     មន្តស្នេហ៍សប្តាហ៍  ។

២   រួតរះប្រាស់ខ្លួន           ជួបជុំបងប្អូន                មិត្តរួមយាត្រា

      តាមរថយន្តតូច          ស្រស់ស្រូបអាហារ       រសឆ្ងាញ់ពិសា

                                    បានស្ងប់រៀងមក​​   ។

៣   រថយន្តលយចេញ      លឿនឆ្ពោះត្របាញ់       ជ្រែកព្រៃច្រកល្ហក

      កាត់ស្ទឹងបឹងបួរ         ទេសចរកុញកក            ជំនោរបោយបក

                                    ល្វើយ ៗបរិសុទ្ធ   ។

៤   នៅមុខភូមិឋាន          ឬស្សីឆ្អើរប្រាណ           ក្រឡាននំដុត

      រសជាតិឈ្ងុយឆ្ងាញ់    ពិសេសបំផុត             យើងទិញហើយថត

                                     អនុស្សាវរីយ៍   ។

៥   សំនៀងក្អាកក្អាយ       យើងច្រៀងសប្បាយ    ឌឺដងវក់វី

     ចំអែចំអន់                  រែកពន់ផ្កាភ្ញី                ទាំងស្រុសទាំងស្រី

                                     សប្បាយកន្លង     ។

៦   សំនៀងក្អាកក្អាយ       កំប្លែងសំដី                 កាត់ព្រៃភូមិផង

     ទេសភាពតាមផ្លូវ         លយជ្រៅរបង            ជ្រូកគោទាំងហ្វូង

                                    ​ ប្រឡែងមាន់ទា  ។

៧   រថយន្តលឿនរេ           ជ្រែកកាត់វាលស្រែ       ខែប្រាំងវេទនា

      អាកាសក្តៅស្ងួត         ស្លឹកឈើជ្រុះផ្ងា           ប្រែពណ៌ព្រឹក្សា

                                     ពណ៌មាសលឿងទុំ  ។

៨   ប្រាំងខុសវស្សា           ខែប្រាំងក្តៅផ្សា            ធម្មជាតិក្រៀមក្រំ

      វស្សាធម្មជាតិ             បៃតងត្រសុំ                ត្រជាក់ត្រជុំ

                                     បែគុម្ភត្រសាយ  ។

៩   ជ្រែកព្រៃវាលល្បោះ      រថយន្តលឿនឆ្ពោះ       កោះកេរ្តិ៍ប្រាង្គល្បី

     ប្រាង្គទេពថ្មភក់            សង់ងើបផុតដី            ប្រាសាទដំរី

                                     ប្រាង្គប្រានាងខ្មៅ   ។

 ១០  កោះកេរ្តិ៍ប្រាង្គធំ          សង់ខ្ពស់ដូចភ្នំ            មើលផុតហួសឆ្ងាយ

       ប្រាង្គពីរ៉ាមីត              គ្រិះថ្មស្កឹមស្កៃ             កំពូលផុតព្រៃ

                                      បីដូចសួគ៌ា  ។​

១១  ប្រាង្គមាំមិនទ្រុត          ប្រាង្គទ្រដោយគ្រុឌ      ថ្មភក់វេហា

       ប្រាង្គងើបផុតដី           ផុតព្រៃព្រឹក្សា            ​  ប្រាង្គថ្មរចនា

                                      តាមក្បាច់ធម្មជាតិ  ។​

១២  ប្រាង្គទ្រដោយគ្រុឌ      ឋានសួគ៌បរិសុទ្ធ          នាំស្ងប់ផងញាតិ

       ប្រាង្គប្រាសាទលឹង្គ      បឹងវែងផងទៀត          ប្រាសាទដាវជ្រៀត

                                       ត្រពាំងប្រីយ៍ស្រស់   ។

១៣  ប្រាង្គរំលំបី                 គុក ត្រពាំងស្វាយ        ដីឆ្នាំងក្រៀមក្រោះ

        ប្រាង្គស្រុកស្រឡៅ      បង្អួតសម្រស់             ប្រាង្គថ្មទាបខ្ពស់

                                      គុកស្រគុំ ខ្មៅ   ។

១៤  ត្រពាំងតា បាត           ដងទង់ប្រាសាទ          សុភីព្រៃក្រៅ

       អណ្ដូងលាក់ខ្លួន         ជ្រាប ប្រាំងបាំងស្មៅ     ជំនះ នាងខ្មៅ

                                      អង្គខ្នាមានរិទ្ធ    ។

១៥  ប្រាង្គទឹកក្រហម         ប្រាង្គព្រហ្មជ្រោះជ្រង      ក្រហមដួងចិត្ត

       ដំរីសទ្រឹង                  សំឡឹងញាតិមិត្ត           រហាលស្នេហ៍ស្និត

                                      លោមលួងទេសចរ   ។

១៦  បន្ទាយពីជាន់             ក្រចាប់ពេនពន់            តែងខ្លួនយ៉ាងល្អ

       ប្រាង្គប្រាសំពេជ្រ         បាំងលាក់វប្បធម៌          ប្រាង្គពេជ្រភ្លេចពណ៌

                                       កប់ក្នុងធរណី   ។

១៧  ប្រាង្គថ្មកោះកេរ្តិ៍           ខឿនវប្បធម៌ខ្មែរ            លើលោកគ្មានពីរ

       ប្រាង្គថ្មស្រោបពេជ្រ      លាក់តាមគីរី                ខ្មែរអើយមូលមី

                                       កៀកស្មាការពារ  ។

 ១៨  ប្រាង្គអាថ៌កំបាំង          កំណប់រាជវាំង             ដ៏មហាអស្ចារ្យ

       ប្រាង្គប្រាអំរិត              ប្រាង្គប្រាក់រាជការ         កប់ក្នុងព្រឹក្សា

                                       ចាំថ្ងៃវិលវិញ    ។

១៩  ប្រាង្គថ្មវប្បធម៌             ទាក់ទាញទេសចរ        គ្មានថ្ងៃទោម្នេញ

       ប្រាង្គមាសប្រាង្គប្រាក់   រៀបរាប់បញ្ចេញ            ប្រាង្គថ្មទន្ទេញ

                                      សូមសន្តិភាព   ។

២០  ទេសចរធម្មជាតិ          កោះកេរ្តិ៍ប្រាង្គញាតិ       អង្គរដ៏រាប

       ឧធ្យានបៃតង              ប្រាង្គថ្មខ្ពស់ទាប          ប្រាង្គសន្តិភាព

                                       កម្ពុជារៀងអើយ  ៕

និពន្ធ និងរក្សាសិទ្ធដោយវេជ្ជបណ្ឌិត ញូង ភក្តី  នៃមាតុភូមិបៃតងកម្ពុជា