កំលាំងសាមគ្គីមន្ទីរសុខាភិបាលខេត្តសៀមរាប បទពាក្យ ៧ ២៨ ០៣ ២០១៥

១  ព្រោះចិត្តមនុស្សធម៌និងមេត្តា       គ្រូពេទ្យខេមរាព្រមគិតគូរ

    បូជាញើសឈាមព្រមផ្លាស់ប្តូរ      សង្គ្រោះអោយធូររោគអប្រិយ  ។

២  ព្រោះចិត្តមនុស្សធម៌និងមេត្តា       គ្រូពេទ្យរដ្ឋាស្ម័ក្រស្រាក់ដៃ

    សាមគ្គីរឹងមាំមិនសំចៃ                ប្រើប្រាជ្ញលកលៃជួយរាស្ត្រខ្មែរ  ។

៣ ព្រោះចិត្តមនុស្សធម៌ជាគ្រូពេទ្យ    មិនដែលបិទភ្នែកឬត្អូញត្អែរ

    ទទួលភារកិច្ចព្យាបាលថែ           សុខភាពរាស្ត្រខ្មែរផុតទុក្ខភ័យ    ។

៤  ព្រោះចិត្តមនុស្សធម៌គ្រូពេទ្យពិត   ព្យាបាលដោយចិត្តនិងវិន័យ

    ក្រសួងមន្ទីរប្រឹងរាល់ថ្ងៃ              សីលធម៌និយាយជាចំបង  ។

៥  ព្រោះចិត្តមនុស្សធម៌និងមេត្តា      មន្ទីរសុខាភិបាលច្បង

    លើកស្ទួយសុខភាពដោយស្មោះត្រង់   មិនអោយខ្មែរយំទៀតឡើយណា  ។

៦  ព្រោះចិត្តមនុស្សធម៌និងសាមគ្គី    ក្រសួងមន្ទីរមិនរុញរា

    សង្គ្រោះមហន្តយាពុលអាហារ    ក្រុមពេទ្យកៀកស្មាយ៉ាងជោគជ័យ  ។

៧  ព្រោះចិត្តមនុស្សធម៌និងសាមគ្គី   ប្រធានមន្ទីរចុះវិនិច្ឆ័យ

    គ្រប់គ្រងស្ថានភាពពុលចំណី      បេះដូងស្មារតីខ្មែរខេមរា   ។

៨  ព្រោះចិត្តមនុស្សធម៌និងសាមគ្គី   ប្រធានមន្ទីរមន្ត្រីការ

    សង្គ្រោះរាស្ត្រខ្មែរស្បើយរោគា   រួចផុតវេទនាក្អួតរាគរុស  ។

៩  ព្រោះចិត្តមនុស្សធម៌បវរពិត    ព្រមចៅហ្វាយខេត្តចិត្តសណ្តោស

    កៀកស្មាសាមគ្គីមិនអោយហួស   ចុះជួយសង្គ្រោះមិនយឺតពេល   ។

១០ យើងសូមអរគុណធំអនេក    សីលធម៌រំលែកគុណក្រាស់ក្រែល

     សូមពរទាំងដប់បានជាខែល   ការពារគ្រប់ពេលកុំឃ្លាតឡើយ  ៕

និព្ធដោយវេជ្ជបណ្ឌិត  ញូង ភក្តី  នៃមន្ទីរពេទ្យកុមារអង្គរ