ទេសចរធម្មជាតិភ្នំពេញកោះកុង បទកាគតិ ១២ ០១ ២០១៥

១   ភ្នំពេញកោះកុង  ទេសភាពឆ្ងាយក្រុង​   អាណុងដួងចិត្ត

​​     ភ្នំពេញអាគារ     ខ្ពស់ល្អប្រណិត        ឆ្នៃម៉ូដប្រឌិត

                             ស្ថាបត្យកម្មថ្មី    ។

២   ភ្នំពេញផូរផង់    ប្រៀបនឹងបេះដូង     ​ កម្ពុជាបុរី

    កាលមុនឆ្ងាយក្រុង   កោះកុងដ៏ល្បី    ឥឡូវលែងឆ្ងាយ

                       ដូចមុនទៀតឡើយ  ។

៣   ភ្នំពេញកោះកុង   តាមរថយន្តក្រុង    ផ្លូវធំល្វឹងល្វើយ

   ទេសភាពបៃតង   កែនកងកៀកកើយ   ក្រោមខ្យល់រំភើយ

                        រំហើយអោបកាយ   ។

៤   ភ្នំពេញកោះកុង រថយន្តលឿនលង់  លឿនលយគ្មានណាយ

     សំឡឹងដងផ្លូវ   ព្រៃជ្រៅអន្លាយ     ហាក់រត់តោងកាយ

                         លួងលោមថ្នមថែ    ។

 ៥   ភ្នំពេញកោះកុង  អារម្មណ៍លក់លង់   ទេសភាពស្រុកខ្មែរ

     ទន្លេព្រែកស្ទឹង   បឹងបួរទ្រព្យកេរ្តិ៍     ញញឹមមន្តស្នេហ៍

                          អមតាមដងផ្លូវ   ។

៦   ភ្នំពេញកោះកុង   ដងភ្នំព័ទ្ធជុំ        រៀបយ៉ាងត្រឹមត្រូវ

      រលកធម្មជាតិ   ជ្រកជ្រៀតលឿនទៅ  ធម្មជាតិដាំនៅ

                           សម្រស់ល្អឯក   ។

៧   ភ្នំពេញកោះកុង  ឆ្លងកាត់តាមក្រុង    ទេសភាពគាប់ភ្នែក

      ខេត្តកំពង់ស្ពឺ      ភ្នំស្រួចពុសញែក    ដងព្រៃនិងព្រែក

                         រាលស្រែចក្រក្រង្ស   ។

៨   ភ្នំពេញកោះកុង  ពេជ្រនិលជ្រោះជ្រង    ដងព្រៃព័ទ្ធវង់

     យាយម៉ៅចិត្តធម៌ អោយពររយពាន់     ញាតិផងវិលជុំ

                        សុវត្ថភាពទៅមក  ។

 ៩   ភ្នំពេញកោះកុង  ឱរ៉ាល់ឧដ្តុង្គ      ច្បារមនចំបក់

      ជ្រោះអន្លង់រ័ត្ន   លាក់ខ្លួនពួនជ្រក    ស្ពានយោលទៅមក

                         សួនគីរីរម្យ    ។

១០  ភ្នំពេញកោះកុង  តាមរថយន្តក្រុង    ពុះជ្រែកដងភ្នំ

      កាតព្រៃវាលស្រែ  ចំការធំ ៗ       ដងព្រៃសត្វយំ

                             រំពងព្រឹក្សា   ។

១១  ភ្នំពេញកោះកុង   តាមរថយន្តក្រុង   រំពៃសោតា

       តន្រ្តីធម្មជាតិ    ម្រឹគីម្រឹគា     ច្រៀងរាំពណ៌នា

                        សម្រស់បៃតង   ។

១២  ភ្នំពេញកោះកុង  តាមរថយន្តក្រុង លឿនលយជ្រែកឆ្លង

       ផុតវាលចូលភ្នំ   កាត់ព្រៃជ្រលង   កាត់ភូមិស្រុកផង

                         ឆ្លងស្ពានអណ្តូងទឹក  ។

 ១៣  ភ្នំពេញកោះកុង  តាមរថយន្តក្រុង   ជួរភ្នំឈរភ្លឹក

       ខំឈរទប់ខ្លួន   ជ្រៀតគ្នាយ៉ាងញឹក  ភ្នំខ្ពស់ព្រៃព្រឹក្ស

                        ការពារអភ័យ   ។

១៤  ភ្នំពេញកោះកុង  តាមរថយន្តក្រុង   ឆ្លងស្ទឹងតាតៃ

       ទឹកជ្រោះធម្មជាតិ រុក្ខជាតិខៀវខ្ចី     ញញឹមប្រឹមប្រិយ

                            ដែនដីសុវណ្ណភូមិ   ។ ត

និពន្ធ និងរក្សាសិទ្ធដោយវេជ្ជបណ្ឌិត  ញូង ភក្តី  នៃមាតុភូមិបៃតងកម្ពុជា