កំណាព្យខ្មែរសហសវត្សថ្មី : កំណាព្យនឹកស្រុកកំណើត បទពាក្យ៧ ០៩ ០៤ ២០១៥

១ កំណាព្យនឹកស្រុកនឹកពុកម៉ែ   ដល់ចូលឆ្នាំខ្មែរសង្ឃឹមជួប 

ឃ្លាតឆ្ងាយយូរហើយថ្ងៃប្រែខួប   ដល់ថ្ងៃបានជួបសប្បាយណាស់ ។

២ កំណាព្យនឹកស្រុកនឹកពុកម៉ែ   កូននៅស្រុកគេហាក់នឹកផ្ទះ 

ពេលជុំមិត្តភ័ក្តអារម្មណ៍ផ្លាស់   ពុកម៉ែនៅនេះល្អយ៉ាងណា ។

៣ កំណាព្យនឹកស្រុកនឹកពុកម៉ែ  សៀមរាបកូនម៉ែហាក់ហុឺហា

 តែទុក្ខក្នុងទ្រូងសែនក្តៅផ្សា  មិនដឹងថ្ងៃណាបានជួបជុំ ។

៤ កំណាព្យនឹកស្រុកនឹកពុកម៉ែ  ម៉ែស្តីថាជេរម៉ែលូចយំ

 ខ្លាចកូនមិនល្អខំលត់ដំ  ម៉ែនឿយក្រៀមក្រំក៏មិនត្អូញ ។

៥ កំណាព្យនឹកស្រុកនឹកពុកម៉ែ  ពុកទូន្មានដែរកុំដំអូញ 

ត្រូវខំធ្វើការកុំរេរួញ  ព្រោះខាងជំនួញកូនមិនឆ្លាត ។

៦ កំណាព្យនឹកស្រុកនឹកពុកម៉ែ  កូននៅស្រុកគេសំបូរញាតិ

 តែចិត្តឯកាព្រោះកូនឃ្លាត  រស់សែនគ្រោតគ្រាតពេកកន្លង ។

៧ កំណាព្យនឹកស្រុកនឹកពុកម៉ែ  កូននឹកម្លេះទេញាតិភូមិផង 

ធ្លាប់សើចញញឹមយ៉ាងត្រសង  បុណ្យភូមិម្តង ៗសែនរីករាយ ។

៨ កំណាព្យនឹកស្រុកនឹកពុកម៉ែ  សៀមរាបនឹកដែរតែនៅឆ្ងាយ 

សុខទុក្ខយ៉ាងណាសំណប់ម្តាយ  ទោះកូននៅឆ្ងាយនឹករហូត ។

៩ កំណាព្យនឹកស្រុកនឹកពុកម៉ែ   ចិត្តគ្មានល្ហើយល្ហែរប្រឹងរៀនសូត្រ 

ប្រឹងប្រែងធ្វើការប្រឹងរហូត  អោយប្រាជ្ញមិនស្ងួតព្រោះច្រអូស ។

១០ កំណាព្យនឹកស្រុកនឹកពុកម៉ែ  សៀមរាបស្រុកខ្មែរតែងសណ្តោស

 អោយកូនបានសុខនិងកិត្តយស  កូនម៉ែកូនប្រុសបានសុខហើយ ៕

និពន្ធដោយវេជ្ជបណ្ឌិត ញូង ភក្តី នៃមន្ទីរពេទ្យកុមារអង្គរ

កំណាព្យខ្មែរសហសវត្សថ្មី