បុណ្យផ្កាប្រាក់មហាសាមគ្គី បទពាក្យ ៧ ១៤ ០៣ ២០១៥

មន្ទីរពេទ្យកុមារអង្គរ                  បេះដូងមនុស្សធម៌ជួយកូនខ្មែរ

ពិនិត្យព្យាបាលសង្គ្រោះថែ         ចិត្តស្ងប់គ្មានប្រែថែមក្លាហាន  ។

មន្ទីរពេទ្យកុមារអង្គរ                  បេះដូងមនុស្សធម៌គ្មានឡើយខាន

ព្យាបាលរោគារុករានប្រាណ       អោយស្បើយសុខសាន្តប្រាជ្ញនិងកាយ ។

មន្ទីរពេទ្យកុមារអង្គរ                 បុណ្យផ្កាមនុស្សធម៌ចិត្តរីករាយ

សាបព្រុសបេះដូងព្រមហឬទ័យ   ជាទានបច្ច័យជួយអ្នកក្សត់    ។

មន្ទីរពេទ្យកុមារអង្គរ                 គឺមានជួយក្រទុក្ខប្រាកដ

បុណ្យផ្កាសាមគ្គីដោយអំណត់    ខ្មែរអើយសូមផុតភាពលោភលន់  ។

មន្ទីរពេទ្យកុមារអង្គរ                 បុណ្យផ្កាមនុស្សធម៌សូមបន្ទន់

សាមគ្គីកៀកស្មាអោយរឹងគ្រាន់   អោយរែកអោយពន់ទានបរិសុទ្ធ  ។

មន្ទីរពេទ្យកុមារអង្គរ                 បេះដូងបវរកំដៅដុត

បង្កើនមនសិការជួយប្រាកដ       ជាទានបរិសុទ្ធយើងម្នាក់ ៗ ។

មន្ទីរពេទ្យកុមារអង្គរ                គឺក្រមសីលធម៌ពេទ្យចងស្រាក់

ព្យាបាលកូនខ្មែរគ្មានវណ្ណៈ        គុណភាពប្រត្យកស្មើ ៗ គ្នា  ។

មន្ទីរពេទ្យកុមារអង្គរ                ច្បាប់ក្រមសីលធម៌និងការងារ

តំលៃមនុស្សជាតិនិងសាសនា    យើងជួយខេមរាផុតរោគភ័យ  ។

មន្ទីរពេទ្យកុមារអង្គរ                តំលៃមនុស្សធម៌ពេជ្រចរណៃ

គឺបុណ្យផ្កាប្រាក់មហាសាមគ្គី    គឺប្រពៃណីខ្មែរជួយខ្មែរ  ។

មន្ទីរពេទ្យកុមារអង្គរ               បេះដូងគុណធម៌គ្មានកែប្រែ

ជាជាតិគំរូខ្មែរជួយខ្មែរ             ខ្មែរអើយសូមខ្មែរសុខក្សេមក្សាន្ត  ៕

និពន្ធដោយវេជ្ជបណ្ឌិត  ញូង ភក្តី  នៃមន្ទីរពេទ្យកុមារអង្គរ