១ មនុស្សមនាសព្វថ្ងៃសែនទំរើស អាងបង្អែកខ្ពស់ឬកគគ្លើន
ចង់គ្មានពេលឈប់ទ្រូងងើយពើន ងើយឡើងធ្វើផ្គើនអាងនឹងឈ្មោះ ។
២ អ្នាកមានអាងទ្រព្យលុយដុល្លារ អាងផ្ទះវិឡារល្អឥតខ្ចោះ
អាងរថយន្តថ្មីដីទាបខ្ពស់ អាងនេះអាងនោះព្រោះលោភលន់ ។
៣ អ្នកមានអាងលុយធ្វើអោយហំ អ្នកក្រអាងយំសុំបែរបន់
ក្រអាងគេជួយឬកទំរន់ សុីដេកមិនខំប្រឹងធ្វើការ ។
៤ អ្នកខ្ជិលអាងសុំចំអែតពោះ សុំអោយតែរស់ស៊ូវេទនា
ខ្វះភាពព្យាយាមក្នុងការងារ កើតស្លាប់ឈឺជាដូចសត្វធាតុ ។
៥ អ្នកឃ្លានអាងសុីមិនចេះឈប់ ខ្លាចអត់សុីគ្រប់ធំតែមាឌ
អាងម្ហូបស្រីស្រាក្លាមាយាឃ សុីហើយសុីទៀតដល់ស្លាប់ខ្លួន ។
៦ អ្នកខ្លាំងអាងមាឌវាយទាត់ធាក់ អាងកាប់អាងចាក់អាងខុសក្បួន
ខុសហើយចង់ឈ្នះឈ្លើយហំហួន ដល់គុកព័ទ្ធខ្លួនទើបដឹងខុស ។
៧ មនុស្សចាស់អាងង៉ក់ងក្នុងចិត្ត អាងមិនចេះគិតស្តីបន្ទោស
អាងត្រូវគ្មានវៀចល្អទាំងអស់ អាងទាល់តែខ្សោះមនុស្សជុំវិញ ។
៨ មនុស្សក្មេងអាងយំផ្សំមិនដឹង ល្ងង់ហើយមិនប្រឹងរៀនទន្ទេញ
មិនអានសៀវភៅមិនបញ្ចេញ ទុក្ខសោកទោម្នេញច្រណែនគេ ។
៩ មនុស្សខូចអាងល្បិចក្បួនបោកប្រាស់ អាងក្មេងអាងចាស់អាងមានមេ
អាងលូចអាងប្លន់អាងមានខ្សែរ អាងលុយសុីញេលើក្រដាស ។
១០ អ្នកចេះអាងប្រាជ្ញអាងវិជ្ជា
ធ្វើឈ្នាន់ភាសាដើរផ្តេសផ្តាស
បំពានអ្នកនេះជាន់អ្នកនោះ អាងបុណ្យសក្តិខ្ពស់ក្នុងរាជការ ។
១១ អ្នកធំអាងលុយអាងអំណាច ហំហួនមិនខ្លាចច្បាប់រដ្ឋា
ដឹងច្បាប់ល្មើសច្បាប់រដ្ឋសភា អាងខ្លួនមានងារជាកុង្សី ។
១២ អាងត្រូវអាងខុសអាងខ្ពស់ទាប
អាងទ្រព្យអាងមាឌអាងឆ្លាតវៃ
អាងសុទ្ធតែខុសគ្មានតំលៃ នាំទុក្ខអោយក្ស័យតែខ្លួនឯង ៕
និពន្ធដោយវេជ្ជបណ្ឌិត ញូង ភក្តី
នៃមន្ទីរពេទ្យកុមារអង្គរ
