មង្គលធម៌ក្នុងបេះដូងយើង បទកាគតិ ២៦ ០៤ ២០១៣

​១  ធម៌មានក្នុងចិត្ត        តាមដោយគំនិត       គិតល្អនៃយើង

    គន្លងផ្លូវត្រូវ              សខ្មៅស្តួចស្តើង        យល់ខុសកុំឆ្មើង

                                  អ្នកផ្តល់ឱវ៉ាត  ។

២  ធម៌មានរស្មី             តេជៈបារមី               បរិសុទ្ធជាញាតិ

     នាំចិត្តអោយស្ងប់      ស្រលាញ់ធម្មជាតិ    មើលមនុស្សផងទៀត

                                  ក្នុងផ្លូវដែលល្អ   ។

៣  ធម៌មិនវង្វេង           កុហក់ខ្លួនឯង           បន្លំភូតភរ

    មិនមានចិត្តក្រោធ     ក្រេវឆោតគ្មានទ្រ       អួតអាងអស់ពរ

                                 ពុកម៉ែផ្តល់អោយ  ។

៤  ធម៌គ្មានគំនុំ            មិនខឹងមូលផ្តុំ           តទៅថ្ងៃក្រោយ

    ធម៌គ្មានទំនាស់        ស្រីប្រុសក៍ដោយ       ស្មើភាពគ្នាហើយ

                                 កុំបីប្រកាន់   ។

៥  ធម៌គ្មានហឹង្សា         ស្មោះត្រង់នឹងគ្នា        កុំអោយមានខណ្ឌ

    កុំបីលោភលន់          ច្រណែនជិះជាន់        ខ្មែរអើយសូមគ្រាន់

                                 ល្បែងស្រាស្រីញី   ។

៦  ធម៌ចិត្តសប្បុរស       ធម៌នាំនូវយស          រស់ដោយសំភី

    តំលៃខ្លួនយើង          ធ្ងន់ជាងគីរី               ខ្មែរអើយមូលមី

                                 កត់ត្រាអោយជាក់  ។

៧  ធម៌ប្រាស្រ័យល្អ      ជីវិតបវរ                   សង្ឃឹមទុកដាក់

     គោរពខ្លួនឯង          ញាតិផងម្នាក់ៗ         មើលឃើញធុរៈ

                                 បងប្អូនជាធំ   ។

៨  ធម៌អធ្យាស្រ័យ        ចិត្តធ្ងន់ខន្តី​              សាមគ្គីមាតុភូមិ

    ខ្មែរមួយមេឃមួយ     កុំព្រួយកុំយំ             យើងរស់សុខុម

                                 ដោយភាពថ្លៃថ្នូរ  ។

៩  ធម៌ល្អបញ្ញា           សមត្ថភាពម្ចាស់ការ    សីលទ្រព្យបរិបូរណ៍

    គោរពវិន័យ            ពុទ្ធពរផង់ផូរ              ក្បួនច្បាប់ត្រាប់គូរ

                                មើលខ្មែរអោយថ្កើង  ។

១០ ធម៌ស្នេហាជាតិ      សាមគ្គីអស់ញាតិ       កំលាំងខ្មែរយើង

     ប្រាប់សាសន៍ដ៏ទៃ    កុំបីផ្គើនឡើង            ថ្ងៃនេះខ្មែរដឹង    

                                 ល្បិចកលអស់ហើយ   ។

           និពន្ធដោយវេជ្ជបណ្ឌិត   ញូង  ភក្តី  នៃមន្ទីរពេទ្យកុមារអង្គរ