មហាចិត្តមនុស្សធម៌ Beat Richner បទពាក្យ៧(23 11 2012)

១  បិតភ្នែកសញ្ជឹងសំលឹងឆ្ងាយ           តាមផ្ទៃជលសៃ​មហាធំធេង

    នឹកដល់ធម្មជាតិភ្នំវាលវែង              Zurich ក្រុងដែនមនុស្សចិត្តធម៌ ។

២  សញ្ជឹងនឹកគិតក្រុងល្អឆើត             ក្រុងផ្តល់កំណើតមនុស្សដ៏ល្អ

   លះបង់ញើសឈាមកាយបវរ           ខ្មែរស្ងើចគុណធម៌ Richner ណាស់ ។

៣  លោកឃើញទុក្ខព្រួយបងប្អូនខ្មែរ      ឃើញទុក្ខអ្នកមែ៉រទាំងក្មេងចាស់

   អោបកូនទួញយំចេញឆ្ងាយផ្ទះ          ក្រាបលូនសំពះគ្រូអូមអាម    ។

៤  ឃើញហើយខ្លោចចិត្តអាណិតក្រៃ     ផ្តួចផ្តើមហឬទ័យផ្សព្វផ្សាយតាម

   មូលនិធិមនុស្សធម៌ពរព្យាយាម          ជួយខ្មែរអោយសមចិត្តលោកមាន  ។

៥  លោកផ្តើមបង្កើតមន្ទីរពេទ្យ          ​   ជួយក្មេងដោយចិត្តប្រស់ប្រទាន

    ឈឺធ្ងន់ឈឺស្រាលរោគរុគរាន            គ្រុនចាញ់គ្រុនឈាមត្រូវថមថយ  ។

៦  គ្រុនក្តៅញ័រញាក់ពុលរាគក្អួត           របេងឆ្អឹងសួតថ្នាំលោកជួយ

   ព្យាបាលត្រឹមត្រូវក្បួនខ្នាតអោយ        រោគធ្ងន់ស្រាលអើយស្រាន្តទៅឆ្ងាយ  ។

៧  ជំងឺចាស់ថ្មីធ្ងន់ប៉ុណ្ណា                     គុន្ឋាបុប្ឋាជួយដោយងាយ

   តាមក្បួនវេជ្ជសាស្រ្តទំនើបសាយ        ប្រាប់ខ្មែរប្រុសស្រីកុំបីខ្លាច   ។

៨  លោកផ្តល់វ៉ាក់សាំង ពិនិត្យពោះ       បន្ទាន់សង្រ្គោះជំងឺកាច

    បាក់ឆ្អឹងតឆ្អឹងទ្រូងប៉ោងពៀច           វះកាត់ចងគៀបស្អាតដូចដើម  ។

៩  លោកជួយកូនខ្មែរអោយសង្ឃឹម       ផ្តល់ស្នាមញញឹមរាល់ដង្ហើម

    បេះដូងនិងចិត្តលោកនៅផ្សើម          កៀងខ្មែរជួយផ្តើមជួយខ្មែរផង  ។

១០ ខ្មែរអើយគិតមើល Beat Richner    លោកមានមនុស្សធម៌ល្អឥតហ្មង

    តស៊ូជួយខ្មែរអោយផូរផង់                ខ្មែរមានអ្វីស្នងសំរាប់គាត់  ។

១១ ខ្មែរព្រួយថ្ងៃមួយគ្មាន Richner        កំពូលមនុស្សល្អមានទៀតអត់

   មនុស្សល្អយ៉ាងនេះប្រៀបទេវបុត្រ       ប្រៀបព្រះមហោសថរស់ម៉ឺនឆ្នាំ  ។

១២ ខ្មែរអើយនឹកដល់មហាគុណលោក  កិត្តយសជ័យជោគត្រូវចងចាំ

    ខ្មែរអើយគោរពរាល់បណ្តាំ                គន្លងលោកនាំខ្មែរអើយជួយខ្មែរ  ៕

       ​និពន្ធដោយវេជ្ជបណ្ឌិត ញូង ភក្តី   កវីមាតុភូមិបៃតង