កំណាព្យបាត់ស្នេហ៍ បទពាក្យ៨ ២៧ ១១ ២០១៣

ថ្ងៃលិចបាត់ទៅលិចទៅទាំងចិត្ត
    សល់តែអតីតដិតដាមស្នាមថើប


នឹកក្លិននឹកខ្លួនរូបល្អគួរស្ញើប
         ថ្ពាល់ដែលបងថើបឃ្លាតទាំងអាល័យ ។

ថ្ងៃលិចបាត់ហើយបាត់ក្នើយបេះដូង 
រញ្ជួយញ័រទ្រូងពេលឃ្លាតឆ្ងាយស្រី


ជីវិតរស់នៅហាក់រស់គ្មានន័យ        
មើលមកលោកីបាត់អស់ទីពឹង ។

ថ្ងៃលិចបាត់ហើយឃ្លាតហើយមាសបង  
រៀមរស់សៅហ្មងអោបទុក្ខយ៉ាងរឹង


លាក់ក្នុងដួងចិត្តជ្រៅគ្មានអ្នកដឹង
    ចង់ប្រាប់ព្រលឹងតែគ្មានឱកាស ។

ថ្ងៃលិចបាត់មែនតែស្នេហ៍មិនសូន្យ
  បារម្មណ៍មាសស្ងួនចិត្តមិនដែលផ្លាស់


ទោះឃ្លាតឆ្ងាយពិតតែចិត្តមានៈ
       ចង់ប្រាប់អូនណាស់ឱកាសមិនមាន ។

ថ្ងៃលិចនាំយកយកសុខសល់ព្រួយ
  នាំរំដួលមួយអោយព្រាត់សុខសាន្ត


អោយបេះដូងនេះលោតទាំងខកប្រាណ    
មើលថ្ពាល់ភួងផានគេថែជំនួស ៕

និពន្ធដោយវេជ្ជបណ្ឌិត ញូង ភក្តី នៃមន្ទីរពេទ្យកុមារអង្គរ