ស្រវឹងកាហ្វេបំពេរចិត្តស្នេហ៍ បទពាក្យ៨ ០៣ ១១ ២០១៣

អង្គុយម្នាក់ឯងក្នុងទៀមកាហ្វេ

ចិត្តនឹកដល់ស្នេហ៍មនុស្សក្នុងបេះដូង

នឹកហើយហាក់ជិតអូននៅក្បែរទ្រូង

ដៃកាន់ប្រលោមក្រសោបដៃស្រី ។

នឹកស្នាមញញឹមមិនចេះសាបសូន្យ

មិនដែលស្រពោនចរិយាសំដី

ជួបម៉ុមម្តងៗបេះដូងញ័រភ័យ

លូចលាក់រូបថ្លៃរាល់ថ្ងៃចំបែង ។

កាហ្វេផ្អែមមុតមិនធន់សំដី

ស្តាប់ហើយអាល័យមមៃហួងហែង

ចង់ស្តាប់ម្តងទៀតរាល់ពេលមុនគេង

ទោះគ្រាន់សំដែងក៍ស្ងប់នឹកនា ។

នឹកអូនរាល់ថ្ងៃគ្មានឡើយពេលភ្លេច

ចិត្តឈឺជានិច្ចពេលឆ្ងាយពុំងា

ធ្វើម្តេចបានប្រាប់អារម្មណ៍រៀមរ៉ា

ធ្វើម្តេចស្នេហាមេត្តារូបបង ។

ចិត្តនឹករាល់ថ្ងៃមមៃគិតទៅ

ដាស់ចិត្តស្រីពៅអោយយល់រៀមបង

ទោះរូបអូនល្អខ្ពស់ហួសចិត្តផ្សង

តែឃាត់បេះដូងបងនេះមិនបាន ។

ស្រលាញ់អូនណាស់នឹកណាស់នឹមនួន

អាសូរផងស្ងួនស្រស់កែវកល្យាណ

សន្យាជាតិនេះមានតែភូមិផាន

មិនក្បត់ប្រែប្រាណធ្វើបាបអូនឡើយ ។

ស្រលាញ់អូនណាស់នឹកណាស់ពាលពៅ

សុំចិត្តឆោមឆ្លៅកុំបីកណ្តើយ

រៀបការនឹងបងបានទេត្រានត្រើយ

យើងស្និតកៀកកើយសាងវាសនាថ្មី ។

កាហ្វេនឹកស្នេហ៍វង្វេងហួសទៅ

សុំចិត្តស្រីពៅសុំភ្ជាប់និស្ស័យ

រៀបការនឹងបងបានទេចរណៃ

បងសូមថ្នមបីជាតិនេះបានទេ ។

និពន្ធដោយវេជ្ជបណ្ឌិត ញូង ភក្តី កវីអភ័ព្វស្នេហ៍បំពេរបេះដូង