ថ្ងៃបុណ្យអុំទូក បទពាក្យ៨ ១៦ ១១ ២០១៣

ថ្ងៃបុណ្យអុំទូកបណ្តែតប្រទីប

ពេលថ្ងៃយើងជាប់រវល់ធ្វើការ

ពេលល្ងាចយើងចេញទៅញុាំអាហារ

យើងញុាំជុំគ្នាជជែកគ្នាលេង ។

ញុាំស៊ុបបន្លែបង្កងក្តាមស្រស់

ស្ពៃជីខ្ទឹមស្រុសទឹកពុះដូចភ្លេង

យើងញុាំបណ្តើរឌឺដងប្រលែង

ចិត្តអស់ចំបែងភ្លេចការនឿយហត់ ។

ថ្ងៃបុណ្យអុំទូកអកអំបុកថ្មី

យើងសែនសប្បាយប្រទីបលយបត់

បណ្តែតតាមស្ទឹងសៀមរាបប្រាកដ

លយលឿនមិនហត់នាំពរសុខសាន្ត ។

ថ្ងៃបុណ្យអុំទូកមុខក្រោយផ្សារចាស់

ភ្លើងពរដេដាសដូចសួគ៌ាឋាន

លំអរដងផ្លូវតន្ត្រីបុរាណ

ស្តាប់ហើយរករានសន្តំអារម្មណ៍ ។

ថ្ងៃបុណ្យដើរលេងតាមផ្សាររាត្រី

មនុស្សមនាប្រុសស្រីស្លៀកពាក់សមរម្យ

ទេសចរច្រើនណាស់តែងមកជួបជុំ

ម៉ាសាញុាំនំញុាំស្រាវីស្គី ។

ថ្ងៃបុណ្យកំសាន្តមើលតាមដងផ្លូវ

មើលយូរៗទៅហាក់ប្លែកជីវី

អារម្មណ៍រំភើបសប្បាយគ្មានពីរ

ពេញមួយរាត្រីបានដោយញញឹម ៕

និពន្ធដោយវេជ្ជបណ្ឌិត  ញូង  ភក្តី  នៃមន្ទីរពេទ្យកុមារអង្គរ