កម្មណាផលហ្នឹង បទពាក្យ ៨(25 02 2007)

១    បញ្ហាជីវិតឋិតនៅបង្កើយ                  ឧបសគ្គថ្ងៃក្រោយអោយចិត្តទួញយំ

     ព្រោះទុក្ខសង្គមទុក្ខធំប៉ុនភ្នំ                 ប្រជានុភូមិយំប្រាប់អ្នកណា    ។

២  ប្រទេសជឿនលឿនកើនច្រើនមនុស្សខូច  ពេញផ្លូវធំតូចកែនគរឈ្លោះគ្នា

     ខ្លះបង់ជីវិតព្រោះត្បិតពាលា              ជក់ល្បែងស្រីស្រាវង្វេងភ្លេចផ្ទះ  ។

៣   ចាញ់ល្បែងអស់លុយចិត្តក្តៅក្រហាយ    លូចឪពុកម្តាយចង់លេងអោយឈ្នះ

     ជីវិតនិងល្បែងតែងនាំអព័្វយស         មិត្តអើយជឿចុះកុំធ្វើបែបនេះ    ។

៤   ខ្លះចិត្តរឹងរួសហួសអស់ដំបូន            ពុកម៉ែប្រាប់ក្បួនផ្លូវល្អត្រិះរិះ

    ម្តងហើយម្តងទៀតព្រោះភាពមានៈ    នាំហេតុផ្តេសផ្តាសអំពើអបាយ  ។

៥   ខ្លះក្លាយជាចោរសង្គមខ្មែរស្អប់         លូចប្លន់សំលាប់តាមដងវិថី

     ប៉ូលីសចាប់បានដាក់គុកក្រោមដី      ទោសចោរព្រៃផ្សៃគុកមួយជីវិត   ។

៦   មិត្តអើយចូរមើលគន្លងផ្លូវល្អ             លូចប្លន់អ្នកក្រក្លាយជនឧក្រិដ្ឋ

     ជាប់ឃុំព្រៃសទណ្ឌកម្មងងឹត               រងទុក្ខកាយពិតដោយអំពើខ្លួន    ។

៧   ម្តេចចង់សប្បាយគ្មានបែបបទរស់    ផ្លូវល្អច្រើនណាស់យកធ្វើជាក្បួន

     ហាត់រៀនលុតដំចំនេះមាំមួន               ធ្វើដូចបងប្អូនពលរដ្ឋខេមរា     ។

៨   មិត្តអើយកុំយកស្រាស្រីជាមិត្ត          អោបល្បែងឧក្រិដ្ឋទុកក្នុងចិន្តា

    ដើរចូលតាមផ្លូវបែបមនុស្សប្ញស្យា      លេងស្រីផឹកស្រាមេរោគច្រើនក្រៃ   ។

៩   សង្គមមេរោគស្វាយអេដស៍ស៊ីដា      វីរុសតណ្ហាបញ្ហាមនុស្សថ្មី

    កើតហើយតែងស្លាប់សូន្យបង់រាល់ថ្ងៃ  រោគទាន់សម័យគ្មានថ្នាំព្យាបាល   ។

១០  កើតអេដស៍អោយស្លាប់ស្គមប្រាណរីងរៃ  ឃើញគេប្រិមប្រិយគិតស្តាយបោកក្បាល

    ខ្លួនឯងទ្រុតទ្រោមព្រោះដុះខុសថ្នាល ​  អ្នកយល់ដំណាលរស់បានយូរលង់   ។

១១  មិត្តអើយចូរគិតជីវិតថ្លៃថ្នូរ                សុខភាពផង់ផូរសង្គមទ្រទ្រង់

    ដើរអីផ្លូវខុសគំរូយង់ឃ្នង                        ធ្វើតាមគន្លងបណ្តាំពុកម៉ែ     ។

១២  មិត្តអើយសង្កេតពួកប្រើថ្នាំញៀន    កញ្ឆាអាភៀននាំអព័្វយសខ្មែរ

    លទ្ធផលពួកនេះមិនដែលល្អទេ      ចុងក្រោយតែងតែសូន្យបង់ជីវិត   ។

១៣  មិត្តអើយពន្យល់មិត្តអ្នកគ្រប់គ្នា           អោយយល់បញ្ហាបណ្តុះគំនិត

     លើកស្ទួយកម្ពុជាអោយខ្ពស់យសពិត     បំបាត់ឧក្រិដ្ឋបទល្មើសព្រហ្មទណ្ឌ  ។

១៤  កៀកស្មាទប់ស្តាត់ពួកចៃសង្គម            ដាក់ទោសអោយធ្ងន់ទោះលូចឬប្លន់

      សណ្តាប់ធ្នាប់ជាតិប៉ូលីសឧត្តម             ជួយគ្នាបង្កើនបូរណៈភាពថ្មី    ។

១៥  ចូរពិចារណាទង្វើអោយជាក់                ខុសច្បាប់ត្រូវផ្អាកបញ្ចប់សេចក្តី

    កុំបណ្តោយខ្លួនជ្រុលហួសវិន័យ             ព្រះពុទ្ធថ្លាថ្លៃជូននិស្ស័យល្អ  ។

១៦  លោកបានប្រដៅប្រុសស្រីគ្រប់រូប       លូចឆក់ស៊ីសូកខុសផ្លូវអធម៌

    ទទួលកម្មខ្លួនកម្មច្រើនតំន                    លោកសូមអង្វរកុំធ្វើបានទេ   ។

១៧  ព្រះពន្យល់ន័យធ្វើល្អបានល្អ             ធ្វើបុណ្យស្មោះសស្តាប់ធម៌កែប្រែ

     កូនស្តាប់បង្គាប់នាំសុខពុកម៉ែ               សងគុណលោកទ្វេពរសុខសួរស្តី  ។

  

        និពន្ធដោយវេជ្ជបណ្ឌិត  ញូង   ភក្តី  នៃមន្ទីរពេទ្យកុមារអង្គរ