១ ពេលថ្ងៃរៀបលិចពពកខ្មៅ បិតបាំងកំដៅលើខ្នងភ្នំ
ព្រឹក្សាទាំងឡាយស្ងាត់ជ្រង សត្វចូលទ្រនំសំរាកកាយ ។
២ រាត្រីខ្យល់បក់សូរល្វើយៗ ល្ហៀកៗប៉ើយៗពីទិសឆ្ងាយ
ស្លឹកឈើព្រៃចាស់ធ្លាក់រើយៗ មេឃអើយម្តេចឡើយអ្នកខ្ពស់ម្លឹង ។
៣ ព្រោះចិត្តបារម្មណ៍នឹកសង្វែង មើលចន័្ទម្នាក់ឯងអស់សង្ឃឹម
ស្រណោះពាក្យពេជ្រស្នាមញញឹម គិតហើយក្រៀមក្រមឈឺខ្លោចផ្សា ។
៤ លូចស្នេហ៍ដួងចន័្ទលូចស្នេហ៍អូន លាក់ទុកក្នុងទ្រូងចិត្តឯកា
មិនហ៊ានប្រាប់ម៉ុមទ្រាំវេទនា ស៊ូលាក់ស្នេហាក្នុងបេះដូង ។
៥ លាក់ស្នេហ៍ដូចយប់លាក់ចន្រ្ទា ទុកក្នុងឱរ៉ាមិនហ៊ានឈោង
មិនហ៊ានប្រាប់ម៉ុមខ្លាចនួនល្អង កាត់ផ្តាច់ចំណងបង្គងចិត្ត ។
៦ ទោះបីស្រលាញ់ស្មើសង្ខារ មិនអាចជួបគ្នាគូរជីវិត
វណ្ណៈសង្គមវណ្ណៈពិត មាសប្រាក់កំរិតលើគូរព្រេង ។
៧
គ្មានទេចិត្តស្មោះលើលោកនេះ វណ្ណៈជាន់ជិះប្តូរតំនែង
ស្មោះមានតែចិត្តស្មោះម្នាក់ឯង គូរព្រេងពិតរឺគ្មានចំលើយ ។
៨
ស្នេហ៍យុវវ័យតែងជ្រុលខក ញាតិផងចំអកថាគ្មានត្រើយ
យកស្នេហ៍ភក្តីចោលព្រងើយ ព្រោះប្រាក់កន្តើយរារាំងប្រាណ ។
៩ តាំងរៀនអោយចប់មានការងារ ចិញ្ចឹមគ្រួសារទើបសុខសាន្ត
ចាស់ទុំប្រដៅផៅសណ្តាន ត្រងត្រាប់ទូន្មានប្រពៃណី ។
១០ តាំងខ្លួនរៀនសូត្រជាការធំ ស្នេហាទុក្ខជ្រាំកុំគិតអី
ក្រែងរស់ជួបគ្រោះងោះព្រោះស្រី បាត់បង់អត្ថន័យតំលៃខ្លួន ។
១១ ស្នេហាក្មេងវ័យគ្មានកោះត្រើយ គួរកុំលឡើយនាំចុកជួន
ជួបស្នេហ៍បាក់បែកទុក្ខផ្ទួនៗ លើក្បូនទឹកភ្នែកឯកាក្រៃ ។
១២ ជីវិតនិស្សិតសប្បាយណាស់ រៀនច្រើនដឹងច្បាស់ចំនេះថ្មី
រៀននៅស្រុកគេស្រស់ឆើតឆាយ កាលបើសាមប្លាយរកប្រពន្ធ ។
១៣ ថ្ងៃលិចបាត់ទៅអង្គុយគិត ថ្លឹងថ្លែងគំនិតពេលយប់យន្ត
បើបានជួបស្នេហ៍ច្បាស់ទារុណ គ្មានអ្វីផ្គត់ផ្គង់ដល់គ្រួសារ ។
១៤ ដាក់ចិត្តរៀនសូត្របន្តទៀត អោយខ្ពស់គំនិតយល់បញ្ហា
យល់អស់សេចក្តីទុក្ខវេទនា ឧបសគ្គវិជ្ជាតាមសម័យ ។
១៥ មានស្នេហ៍មានទុក្ខពាក្យចាស់ថា ស្នេហ៍ពេលសិក្សាអ័ព្វប្រាជ្ញន័យ
បំផ្លាញទំពាំងស្នងឬស្សី កាត់ក្តិចត្រួយថ្មីកុលបុត្រល្អ ។
និពន្ធដោយវេជ្ជបណ្ឌិត ញូង ភក្តី នៃមន្ទីរពេទ្យកុមារអង្គរ
No comments:
Post a Comment