Wednesday, November 5, 2014

រំដួលដងស្ទឹងត្រជាក់ បទពាក្យ៧ ០១ ១២ ២០១២


    ឈរលើខ្នងភ្នំសំឡឹងឆ្ងាយ               មើលឃើញព្រឹក្សព្រៃមហាធំធេង
   ជំនោរឥសាន្តកាត់វាលវេង                  ល្ហៀកល្ហើយកើយគេងអស់ធម្មជាតិ  ។
២   ជំនោរនាំយកនូវក្លិនស្រូវ                  ក្រអូបភាយទៅនៅមិនឃ្លាត
    សណ្តំបេះដូងបរិសុទ្ធស្អាត                ខ្នងភ្នំតុសិតពិតមនោរម្យ    ។
៣   ព្រឹក្សព្រៃស្ងប់ស្ងៀមភ្លឹកនឹកភ្លក         នាសាស្រូបយកក្លិនមាសម៉ុម
     រំដួលដងស្ទឹងស្រស់ក្រពុំ                  ក្បាលស្ពានខ្នងភ្នំម្ចាស់វាសនា   ។
៤   លូចមើលនាងដើរសងខាងផ្លូវ          អស់មនុស្សស្ងៀមនៅផ្ចង់នេត្រា
    ស្រម័យឃើញបានកាន់ហត្ថា            កៀកកើយកាយាស្រស់វល័ក្ខ     ។
៥   មើលកាយមើលចិត្តតាមទៅមក       តាមទូកពួនជ្រកម្លប់ដើមម្កាក់
    នាងអុំទូកលេងក្បង់ទឹកធ្លាក់             ដងស្ទឹងត្រជាក់លាក់នឹមនួន   ។
៦   ជិះឡានតាមទូកទល់កំពង់            ផ្កាព្រៃជំទង់ភ័យបាំងខ្លួន
    ភ្នំបូកក្បាលស្ពានលួចមើលស្ងួន       ងូតទឹកបែរខ្នងពង់ក្រមា    ។
៧   ភ្នែកប្រឹងសំឡឹងផ្ចង់នឹកគិត           នែបនិតកាយពិតល្អយ៉ាងណា
    ចង់កើតជាទឹកស្ទឹងដ៏ថ្លា                 នាងហែលផ្កាប់ផ្ងារាល់ៗថ្ងៃ   ។
៨   ជាតិនេះផ្សងជួបរំដួលផ្កា               ស្ទឹងអើយមេត្តាប្រាប់ចរណៃ
    ជួយលោមចិត្តម៉ុមកុំបីភ័យ             ថ្នមចិត្តកាយស្រីមិនអោយហ្មង  ។
៩   ជាតិនេះផ្សងរស់ក្បែររំដួល            សូមចិត្តនិមលប្រណីផង
   ស្ទឹងត្រជាក់អើយជួយចងក្រង          ផ្តាំម្ចាស់បេះដូងកុំជ្រើសគេ   ។
១០  ជាតិនេះកើតមកពេញចិត្តថ្លៃ        បាគងលរលៃកុំបីប្រែ
   ស្ទឹងអើយកុំរីងចោលក្លិនស្នេហ៍         ស្ម័ក្រស្លាប់មើលថែររំដួលផ្កា  ៕
   និពន្ធដោយវេជ្ជបណ្ឌិត ញូង ភក្តី  នៃមន្ទីរពេទ្យកុមារអង្គរ
​      

No comments:

Post a Comment