ក្តីបារម្មណ៍អ្នកម្តាយ បទព្រហ្មគីតិ ២៦ ១២ ២០០៨

១  កូនអើយកូនមាសម្តាយ           នៅក្នុងផ្ទៃគេងអោយស្កប់

   កុំព្រួយម្តាយគេងអោប              លោមថ្នមថើបមិនអោយហ្មង  ។

២  កូនអើយកូនសំណប់              សម្បត្តិទ្រព្យពៅនួនល្អង

   កូនម៉ែត្រាប់គន្លង                     ម្តាយទ្រាំរងរាល់អ្វី ៗ  ។

៣  កូនអើយម្តាយការពារ             តមអាហារនំចំណី

   ធ្វើត្រាប់តាមវិន័យ                    ខ្លាចកូនថ្លៃរងទុក្ខទោស  ។

៤  ពេលញ៉ាំពេលគេងទៅ            ទុក្ខហ្មងសៅព្រោះសណ្តោស

   អារម្មណ៍កូនម្តាយនោះ             រងរបួសព្រោះតែម៉ែ   ។

៥  រាល់ថ្ងៃម្តាយគេងគិត              នឹករូបពិតកូនមាសស្នេហ៍

   សុខទុក្ខកូនម្តេចដែរ                 ក្នុងពោះម៉ែនឹងយ៉ាងណា  ។

៦  កូនអើយពិភពលោក              កូនកើតមកស្រស់អស្ចារ្យ

   ចិត្តម្តាយស៊ូវេទនា                   ព្រមគ្រាំគ្រាដើម្បីកូន  ។

៧  ទោះទុក្ខកើនឡើងទ្វេ             ម្តាយនឹងថែរថ្នមមាសស្ងួន

   មិនអោយអ្វីរុកគួន                  ព្រោះនឹមនួនម្តាយលំបាក  ។

៨  អ្នកម្តាយតែងបារម្មណ៍           តូចដល់ធំឥតស្រាន្តស្រាក

   ខ្លាចគូនម៉ែតោកយ៉ាក             រស់គ្រោតគ្រាតមិនឆ្លាតវៃ  ។

៩  ម្តាយខំរកគ្រប់សព្វ               មកបង្រ្គប់ជួនកូនថ្លៃ

   សិក្សារៀនលកលៃ                 ខ្វះខាតក្តីខាំមាត់រស់  ។

១០ ខ្លាចកូនត្រាប់មិនល្អ            ខុសផ្លូវធម៌ធ្លាក់ក្នុងជ្រោះ

   សូមកូនដើរតាមមនុស្ស          មានកិត្តិយសស្រស់ថ្លៃថ្លា  ។

១១ កុំរៀនត្រាប់ពាក្យជេ            នាំអ័ពកេរ្តិ៍ពូជគ្រួសារ

   គន្លងល្អដូនតា                     កូនអើយណាកុំបីហ្មង  ។

១២ កូនល្អម្តាយផុតព្រួយ         កូនម៉ែមួយចូរស្មោះត្រង់

   ច្បាប់ក្បួនលោកតម្រង់          កូនកុំឆ្គងប្រពៃណី  ។

១៣ ម្តាយចង់ឃើញកូនល្អ       សុខបវរក្នុងលោកី

   សូមកូនផុតទុក្ខភ័យ             កម្មរាល់ថ្ងៃម្តាយទទួល  ។

១៤ កូនអើយយល់ចិត្តម៉ែ         លើកខ្ពស់កេរ្តិ៍ទុក្ខជាន់ដួល

   ផលល្អកុំបោះចោល             កុំដេញដោលរឿងគ្មានការ  ។

១៥ កូនអើយកូនម៉ែមួយ          កុំនាំព្រួយអោយម៉ែណា   

   ទុក្ខទោសល្បែងស្រីស្រា        អ័ពយសាពូជខ្មែរល្អ  ។

១៦ កូនអើយម៉ែបារម្មណ៍         ម៉ែលូចយំកូនឃ្លាតធម៌

   ទណ្ឌកម្មខ្មៅលាយស           កុំបីឈរកៀកពេកកូន  ៕                         

   

   និពន្ធដោយវេជ្ជបណ្ឌិត  ញូង  ភក្តី  នៃមន្ទីរពេទ្យកុមារអង្គរ