មហាទុក្ខតោថ្ម បទពាក្យ៧​ ២២ ០៨ ១២

១  យើងកើតជាខ្មែរពូជអ្នកខ្លាំង            អ្នកប្រាជ្ញអ្នកច្បាំងការពារជាតិ

   ប្រាង្គប្រាអង្គរបង្ហាញញាតិ               ប្រាប់ខ្មែរផ្សេងទៀតអោយបានដឹង ។

២  ប្រាជ្ញខ្លាំងខ្លាំងគិតខ្លាំងកសាង      អភិវឌ្ឍន៍ថ្កើងថ្កានមិននៅទ្រឹង
  កើតស្លាប់ជាខ្មែរចិត្តសញ្ជឹង              ខំឈរអោយរឹងពាំងសត្រូវ ។

៣   ខ្មែរអើយដួងចិត្តសែនក្តុកក្តួល   ប្រាង្គថ្មដេកដួលពាសពេញផ្លូវ

   ជ្រុះធ្លាក់បាក់បែករាល់រដូវ            ពុកផុយហួសទៅគ្មានអ្នកថែរ  ។

៤   ឃើញហើយដួងចិត្តសែនសង្វេគ  ស្រណោះពន់ពេកមរតកកេរ្តិ៍

   តោថ្មទួញយំថ្ងូរប្រាប់ខ្មែរ             ទឹកភ្នែកឥតល្ហែនាយសមុទ្រ  ។

៥   តោថ្មឃ្លាតឆ្ងាយភូមិកំណើត      បងប្អូនបង្កើតទ្រូងអើយស្លុត

   ទឹកភ្នែកតោហូរក្តៅដូចដុត          កាត់ថ្មបរិសុទ្ធបែកពុកផុយ   ។

៦   តោថ្មរត់គេចព្រោះមនុស្សពាល  ដាប់ដុតគាស់ឆ្គៀលដោយល្មោភលុយ

   កាមៈទោសៈពុករលួយ              ចិត្តអើយសែនព្រួយសែនឈឺណាស់  ។

៧   តោថ្មបាក់ជើងរបួសធ្ងន់          ព្រោះអ្នករត់ពន់ថ្មីក្មេងចាស់

   លក់អោយចោរព្រៃមុនថ្ងៃរះ       អោយតោព្រាត់ប្រាស់ដែនសុវណ្ណភូមិ  ។

៨   តោអើយអើយតោរត់ដល់ណា  តោអើយអនិចារប្រាង្គថ្មធំ

    ចាំអ្នកក្នុងព្រៃស្ងាត់ជ្រងំ            ចិត្តអើយទួញយំសូមវិលវិញ  ។

៩   តោនៅទីឆ្ងាយនឹកភូមិស្រុក           នឹកព្រៃអូរថ្លុកសែនទោម្នេញ

    ថ្ងៃណាខ្មែរឈប់ដោះដូរទិញ           មរតកទំនិញតំណែលជាតិ  ។

១០  តោថ្មនៅឆ្ងាយចង់មករស់             ការពារអូរជ្រោះខ្មែរតទៀត

    កសាងអនាចក្រសន្តិភាព                ប្រាប់ខ្មែរថាជាតិជាជីវិតអ្នក ។

១១ យើងកើតមកហើយឈាមជ័រខ្មែរ   កើតស្លាប់ជាខ្មែរស្មាកៀកស្រាក់

   ជីវិតយើងមួយចិត្តមិនរាជាក់             កុំអោយខ្មែរធ្លាក់ទាសករខ្លៅ ។

១២ យើងធំចាស់ស្លាប់លើធរណី         ប្រាប់ខ្មែរប្រុសស្រីជាកូនចៅ

  មហាទុក្ខតោថ្មបារម្មណ៍នៅ              ស្លាប់មែនចិត្តដៅជាប់នឹងជាតិ  ៕

  

  និពន្ធដោយវេជ្ជបណ្ឌិត  ញូង ភក្តី នៃមន្ទីរពេទ្យកុមារអង្គរ