មើលជាតិជាធំ បទកាគតិ ១៥ ០៧ ២០១៣

១  យើងកើតជាតិនេះ       ស្វែងរកចំណេះ       ជួយរាល់រាស្ត្រខ្មែរ

    យើងម្នាក់ជួយម្នាក់      ស្មាស្រាក់ជាខ្សែរ     ចិត្តស្មោះមិនរេ

                                 មិនក្បត់ជាតិឯង   ។

២  យើងកើតជាតិនេះ       គំនិតត្រិះរិះ             មិនអោយវង្វេង

     វប្បធម៌ដ៏ទៃ               ប្រៀបបានជាផ្សែង    កុំបីហួងហែង

                                លំអខ្លួនអ្នក  ។

៣  យើងកើតជាខ្មែរ        ការពារមើលថែ         សម្បត្តិអមតៈ

    ប្រពៃណីជាតិ           ញាតិផងរាក់ទាក់      យើងរស់រួមរក្ស

                                កម្ពុជាបៃតង   ។

៤  យើងរស់ជាតិនេះ​​        កុំបីគេចវេះ            កាតព្វកិច្ចច្បង

    សម្បត្តិវប្បធម៌          ដែលល្អផូរផង់         រក្សាអោយគង់

                              ជាប្រយោជន៍ជាតិ   ។

៥  យើងរស់ជាខ្មែរ         ដូនតាទុកកេរ្តិ៍          សម្បត្តិព្រោងព្រាត

   ប្រាង្គប្រាសាទថ្ម       ព្រឹក្សព្រៃធម្មជាតិ      ចិញ្ចឹមផងញាតិ

                               ថែមផ្តាំកុំធ្វេស  ។

៦  យើងរស់ជាខ្មែរ        ស្នាមញញឹមខ្មែរ       កិត្តិយសពិសេស

   ក្រោមម្លប់ត្រជាក់     មហាក្សត្រអង្គនេះ    យើងថ្វាយពរឈ្នះ

                              ទសពិធរាជធម៌  ។

៧  យើងកើតជាខ្មែរ      យើងរស់ជាខ្មែរ         កម្ពុជាបវរ

   យើងស្រលាញ់ជាតិ  ដោយចិត្តស្មោះស    យើងរស់ត្រេកអរ

                               ដោយជាតិរុងរឿង  ។

៨  យើងរស់ជាខ្មែរ      យើងស្លាប់ក៍ខ្មែរ      កម្ពុជាមាសលឿង

  មាសសុទ្ធមិនខ្លាច   ទោះភ្លើងខ្លាំងឡើង    ស្មាកៀកទ្រូងពើង

                               សមរភូមិអភិវឌ្ឍ  ។

៩  យើងកើតរស់ស្លាប់  មើលខ្មែរអោយសព្វ   ម៉ឺងម៉ាត់ប្រាកដ

    កុំបីភ្លេចខ្លួន            ក្រុងរឺជនបទ           រាស្ត្រខ្មែរនឹងស្លុត

                             ពេលទ្រព្យបាត់បង់   ។

១០ យើងខ្មែរថែជាតិ     ឈមជ័ររាស្ត្រក្សត្រ     រួមរក្សអោយគង់

    ស្មាកៀកស្មាគ្នា        ឈរខ្លួនអោយត្រង់    ការពារអោយមាំ

                                ជាជាតិគំរូ   ៕

  និពន្ធដោយវេជ្ជបណ្ឌិត  ញូង  ភក្តី  កវីមាតុភូមិបៃតង