១ ជំលោះខេមរាតែងបានដោះស្រាយ ជំងឺនយោបាយបញ្ហាក្នុងក្រៅ
រឿងកើតថ្ងៃនេះតដល់កូនចៅ ខ្មែរអើយដំបៅថ្ងៃណាបាត់ស្នាម ។
២ ខ្មែរអើយគួរខ្មាសវីរៈបុរស ដែលមានកិត្តិយសស្លាប់ក្នុងសង្រ្គាម
ក្រឡាហោមគង្សស៊ូបង្ហូឈាម ឈ្មោះអ្នកក្លាហានការពារទឹកដី ។
៣ ខ្មែរអើយនឹកគុណក្រឡាហោមគង្ស ស្មោះស្លាប់សូន្យបង់ទុកងារប្រពៃ
ខ្មែរអាណិតខ្មែរការពារបុរី ខេមរាឃ្មាតខ្មីជួយអ្នកជានិច្ច ។
៤ ខ្មែរគ្រប់គ្រងខ្មែររកសុខប្រជា ខ្មែរក្រាបវន្ទាដល់អ្នករដ្ឋកិច្ច
កុំដាក់ជាតិខ្លួនអោយគេកំទេច ព្រោះចាញ់កលល្បិចពួកមាទាំងពីរ ។
៥ រាស្រ្តខ្មែរកៀកស្មាលើកដៃបួងសួង ទេព្វតាឥន្ទព្រហ្មការពារធរណី
បណ្តុះចិត្តខ្មែរព្យាយាមសំភី បង្កើនស្មារតីអ្នកស្នេហាជាតិ ។
៦ ខ្មែរអើយក្រឡេកអោយសព្វទិស ល្បិចកលច្រើនណាស់ដោះស្រាយរាល់ស្នៀត
ពាក្យគេញុះញង់កុំបីយកបៀត ក្រែងខ្មែរបែកបាក់សាមគ្គីរឹងមាំ ។
៧ ភ្នែកអើយក្រឡេកមើលខ្មែរផ្សេងទៀត ភ្នែកអើយកុំបិទពេលខ្មែរជួបកម្ម
ឃើញហើយមេត្តាដោះស្រាយតាមក្រម ប្រជាទួញសុំកុំឡើយភ្លេចសាសន៍ ៕
និពន្ធដោយវេជ្ជបណ្ឌិត ញូង ភក្តី នៃមន្ទីរពេទ្យកុមារអង្គរ
No comments:
Post a Comment