កំណាព្យពេទ្យល្អខ្មែរល្អ បទកាគតិ ០៦ ០៥ ២០១៤

ខ្មែរអើយអើយខ្មែរ        កុំចាញ់បោកគេ           គ្រូធ្មុបកាមគុន

កាលបើអ្នកឈឺ           ជំងឺស្រាលធ្ងន់            កុំបីបន់ស្រន់

                               ក្រែងធ្ងន់លើសដើម  ។

ខ្មែរអើយអើយខ្មែរ        ជាគ្រូពេទ្យដែរ              កុំអោយខ្មែរខ្ពើម

ក្រែងខ្មែរលោកស្អប់     ល្មោភទ្រព្យលុយហើម   ពេទ្យអើយសូមផ្តើម

                               ជាគ្រូពេទ្យល្អ    ។

ខ្មែរអើយអើយខ្មែរ        កុំផ្គើនពេទ្យខ្មែរ             ឃើញគេបវរ

កុំអាងមានលុយ         លុយលុបសីលធម៌        អាសន្នគ្រាក្រ

                               ខ្មែរទេជួយខ្មែរ   ។

ខ្មែរអើយកូនខ្មែរ          អ្នកឈឺក៍ខ្មែរ                គ្រូពេទ្យក៍ខ្មែរ

កុំគេងទ្រព្យធន           លោភលន់ទ្រព្យគេ        ត្រកូលយើងខ្មែរ

                               ពូជខ្មែរដូចគ្នា    ។

ខ្មែរអើយកូនខ្មែរ          ចេះតិចតួចទេ               កុំបីមហិមា

មិនត្រូវជចេស            រឹងរួសហួសងារ             ល្ងង់ខ្លះទៅណា

                               ក្រែងយល់បានច្រើន   ។

ពេទ្យអើយពេទ្យល្អ       កុំអាងដុកទ័រ               សមត្ថភាពមិនកើន

មិនស្រាវជ្រាវថ្មី           ឈ្លាសវៃចំរើន              ក្រែងជំងឺផ្គើន

                               អោយបរាជ័យ   ។

ខ្មែរល្អពេទ្យល្អ            សុខភាពខ្មែរល្អ             សង្គមយើងល្បី

ខ្មែររៀនបានខ្ពស់         កើនយសមន្រ្តី              ជួយជាតិរាល់ថ្ងៃ

                               កុំមានធ្វេសឡើយ  ។

ពេទ្យអើយពេទ្យល្អ       កុំបីជាន់ក                   អធម៌ជាក្នើយ

សីលធម៌គ្រូពេទ្យ         កុំបីព្រងើយ                 ក្រែងស្លាប់ទៅហើយ

                               នៅយសអ្នកជា   ។

ពេទ្យអើយពេទ្យល្អ       ទោះស្លាប់ទៅក្រ          កិត្តិយសការងារ

កុំស្អុយអសោច           ដូចខ្មោចពាលា           គួរពិចារណា

                                ប្រជ្ញាកំហុស     ។

ពេទ្យអើយពេទ្យល្អ      ទោះកើតមកក្រ             ជីវិតត្រូវរស់

កុំបីរើសអើង               យើងខ្មែរទាំងអស់         ខ្មែរអើយរៀនរស់

                              ជួយគ្នាផងណា     ៕

និពន្ធ និងរក្សាសិទ្ធដោយវេជ្ជបណ្ឌិត  ញូង  ភក្តី  នៃមន្ទីរពេទ្យកុមារអង្គរ