បេះដូងមនុស្សធម៌ បទពាក្យ៧ ១៥ ០១ ២០១៣

១​​  យើងខ្ញុំជា  កុមារខ្មែរល្អ                    បានក្រោកឈរ  រួចផុតទុក្ខភ័យ

    យើងញញឹម  សុខភាពថ្លាថ្លៃ           ​ ស្បើយគ្រោះកាយ ម៉ាក់ប៉ាស្ងប់ចិត្ត ។

២  យើងខ្ញុំជា  កលបុត្រខេមរា             ស្មាកៀកស្មា ដៃប្រណមគិត

     សញ្ជឹងគុណ  មនុស្សធម៌ល្អពិត        មន្ទីរពេទ្យ កុមារអង្គរ   ។

៣  ទោះយើងឈឺ  ធ្ងន់ស្រាលយ៉ាងណា  ពេទ្យឧស្សា  ថែរទាំដោយធម៌

     មិនលំអៀង  យើងមានរឺក្រ             ខ្មែរខ្មៅស ព្យាបាលដូចគ្នា  ។

៤  ទោះយើងឈឺ  ជាប់ដោយខ្ទុះឈាម   ក្លិនខ្លួនប្រាណ ហើមខុសធម្មតា

   ពេទ្យញញឹម  ប្រៀបបាននឹងផ្កា         ខំធ្វើការ  ថែរទាំអោយល្អ  ។

៥  ពេទ្យនឿយហត់  មិនថាយប់ថ្ងៃ        ថ្នមសំដី  ដោយក្រមសីលធម៌

    យើងសប្បាយ  ពុកម៉ែក៍អរ              យើងសារទ័រ  ខ្មែរស្រលាញ់ខ្មែរ  ។

៦  ពេលយើងឈឺ យើងមិនដែលភ័យ   យើងកាន់ដៃ  ម៉ែទៅនឹងគេ

    សប្បាយចិត្ត  ដើរតាមហូរហែរ         សង្ឃឹមតែ ជំងឺយើងជា  ។

៧  ពេលយើងឈឺ  យើងសុំពេទ្យជួយ   មិនដែលព្រួយ  រាំរ៉ៃគ្រាំគ្រា

    គ្រូពេទ្យល្អ  សុខភាពខេមរា            សង្ឃឹមជា  គ្រូពេទ្យគំរូ ។

៨  យើងកៀកស្មា  ជួនពរដល់អ្នក       យើងជឿជាក់  លោកមិនរអ៊ូ

    ជួយកូនខ្មែរ  សូមកុំបន្ធូរ                ដូចទឹកហូរ  គ្មានថ្ងៃគោករីង  ។

៩  យើងកៀកស្មា  សន្យានឹងអ្នក        បេះដូងស្ម័គ្រ  ញាតិមិត្តពូមីង

    ស៊ូស្លាប់ខ្លួន បើអស់ស្រលាញ់         មាតុភូមិវិញ ក្នុងចិត្តរហូត  ៕

    

  និពន្ធដោយវេជ្ជបណ្ឌិត ញូង  ភក្តី នៃមន្ទីរពេទ្យកុមារអង្គរ

              (សូត្រតាមចម្រៀង ដើររឺដេកដងខ្លួនអោយត្រង់)

​