គ្មានន័យលើសហ្នឹង បទពាក្យ៧ ០៨ ១០ ២០១៣

១  គ្រាន់តែភ្នែកមើលសំលឹងគ្នា   ចិត្តផ្សេងគិតថាដូចស្រលាញ់

តាមពិតជាមិត្តសំដែងចេញ     គ្មានក្តីស្រលាញ់បន្តិចទេ   ។

២  គ្រាន់តែនិយាយរកគ្នាមួយមាត់  យល់ខុសមួយព្រាត់ផុតមួយខ្សែរ

តាមពិតជាមិត្តគ្មានទេស្នេហ៍   ចិត្តនេះដឹងដែរនៅតែខុស   ។

៣  គ្រាន់តែញុាំបាយនឹងគ្នាម្តង    មានអ្វីនឹងឆ្គងអោយកំហុស

តាមពិតជាមិត្តគ្មានជ្រុលហួស  ទាំងស្រីទាំងប្រុសដឹងច្បាស់ហើយ  ។

៤  គ្រាន់តែញញឹមរស់ស្និតស្នាល  ម្តេចក៍ហួសរាលដូចខ្យល់ល្ហើយ

តាមពិតគ្មានអ្វីធំដុំឡើយ        មេឃអើយដីអើយសាក្សីផង  ។

៥  គ្រាន់តែចិត្តគិតក៍មិនហ៊ាន      កុំឡើយដេកស្មានគិតគួចផ្សង

តាមពិតជាមិត្តសោះនួនល្អង   មិនចង់អោយទ្រូងមានដ៉បៅ    ។

៦  គ្រាន់តែចង់បានស្ងប់ដល់ចិត្ត   មិនច្បាស់កុំគិតកុំបីហៅ

ជាមិត្តពេលនេះរហូតទៅ       គ្មានខុសគ្មានត្រូវមិត្តដដែល  ។

៧  គ្រាន់តែចង់រស់នៅម្នាក់ឯង   មិនចង់វង្វេងក្វែកខ្លែងខែល

ម្តេចក៍លំបាកលើសខូចខិល    ក្នុងចិត្តមន្ទិលធ្វើយ៉ាងណា   ៕

  និពន្ធដោយវេជ្ជបណ្ឌិត   ញូង  ភក្តី  នៃមន្ទីរពេទ្យកុមារអង្គរ