ថ្ងៃលិចថ្ងៃរះ បទពាក្យ ៧ ០៩ ០៩ ២០១៣

អ្នកមានមិនចេះជួយអ្នកក្រ

តាមបែបមនុស្សធម៍គ្មានសំណង

ចង់សុខតែគ្រួសារខ្លួនម្តង

អ្នកឃ្លានស្លាប់បង់មិនរវល់ ។

អ្នកមានមានលុយកប់ពពក

អ្នកក្រគ្មានជ្រកព្រួយខ្វាយខ្វល់

ខ្វះបាយម្ហូបញុាំត្រាំកម្មផល

ជីវិតអំពល់សែនវេទនា ។

អ្នកមានហេតុម្តេចខ្វះសីលធម៌

ជួយដល់អ្នកក្រញាតិល្អគ្នា

ប្រយោជន៍ផ្ទាល់ខ្លួននិងគ្រួសារ

អោបជាប់កាមាមិនដែលភ្លេច ។

លោកនេះយើងរស់ហាក់បវរ

តែយុត្តិធម៌ដូចថ្ងៃលិច

អយុត្តិធម៌រះឡើងស្រេច

មានក្រេហតុម្តេចខុសគ្នាឆ្ងាយម្លេះ ?

ថ្ងៃណាអ្នកក្រក្លាយជាមាន

វីឡាលុយឡាននិងចំណេះ

បើសង្គមមនុស្សលោភយ៉ាងនេះ

ម្នាក់ៗចង់ឈ្នះមានតែឯង  ។

ថ្ងៃណាយើងចេះគិតស្រលាញ់

កៀកស្មាស្រាក់វេញមិនសំដែង

ជួយគ្នាដោយចិត្តស្មោះឥតក្លែង

ខ្មែរអស់សង្រែងព្រឹកខ្វះល្ងាច  ។

ថ្ងៃណាភូមិស្រុកសុខក្សេមក្សាន្ត

សន្តិភាពរស់រានច្បាប់អង់អាច

ការពារមនុស្សល្អមិនខ្លបខ្លាច

អយុត្តិធម៌លិចយុត្តិធម៌រះឡើង  ៕

និពន្ធដោយវេជ្ជបណ្ឌិត  ញូង ភក្តី  នៃមន្ទីរពេទ្យកុមារអង្គរ