ទេសភាពឯកភ្នំ បទកាគតិ ២៥ ០៥ ២០១៣

១  ថ្ងៃជ្រេទន់ទាប            រំលេចទេសភាព             ដងអូរសោមនស្ស

    ស្ពានដែកស្ពានថ្ម        ឈរត្រៀបសែនស្រស់      ដងព្រៃល្បាប់ល្បោះ

                                   តាមឈ្មោះឯកភ្នំ   ។

២  ក្រោមស្ពានទឹកហូរ     ក្មួលក្មាញ់ខ្យល់ថ្ងូរ           ព្រមសៀងរៃយំ     

    តន្រ្តីធម្មជាតិ              ល្វើយៗរងំ                     ពិរោះរណ្តំ

                                   ជ្រាបស្ងប់បេះដូង  ។

៣  ដងអូរសោមនស្ស      ពែនពាន់ដូចពស់             តាមផ្លូវព្រៃជ្រោង

     ហ៊ុំព័ទ្ធប្រាង្គថ្ម            ល្អល្អះប្រៀបត្បូង            ក្បាច់ក្បូរផូរផង់

                                   គួរគន់មិនណាយ   ។

៤  ធម្មជាតិអូរធំ              ប្រាង្គថ្មឯកភ្នំ                 ញញឹមរីករាយ

    ទទួលអស់ញាតិ         ជូនសុខសួស្តី                តាមគ្រប់និស្ស័យ

                                   កុំឃ្លាតម្នាក់ណា    ។

៥  ក្រោមម្លប់ពោធិជ័យ    ត្រជាក់ដល់កាយ           ស្បើយទុក្ខចិន្តា

    បួងសួងក្នុងចិត្ត          ពាក្យពិតវាចារ               សូមរួចកម្មពៀរ

                                   ជៀសគ្រោះអស់ភ័យ  ។

៦  ស្រះទឹកបុរាណ         ថ្លាឈ្វេងដូចញាណ        ផ្កាឈូករីកសាយ

    បង្កើនទេសភាព         ប្រាង្គថ្មរាល់ថ្ងៃ                ទេសចរប្រុសស្រី

                                   ពេញចិត្តអនេក   ។

៧  ស្រះទឹកមនោរម្យ       ទ្រភ្នេនអង្គធំ                  នាំបុណ្យចាយចែក

     សន្សំសីលទាន         បួងសួងពន់រែក              មនុស្សល្អសុច្ចរិត

                                   សោយសុខអស់កម្ម  ។

៨  ព្រះពុទ្ធិអង្គធំ             ញញឹមមើលជុំ              ថ្នមថែមុឺនឆ្នាំ

    ប្រាង្គថ្មប្រៀបពេជ្រ      ត្បូងពណ៌អង្កាំ               ផ្តាំខ្មែរជួយចាំ

                                   កុំបីបំផ្លាញ   ។

៩  ប្រាង្គថ្មទ្រុឌទ្រោម       ប្រាង្គបាក់ប្រាង្គឈោង    ននៀលអោបក្រាញ

    រក្សាខ្លួនប្រាណ​           ស្នាដៃជំនាញ                ប្រាង្គបង្អួតរាង

                                   ទេសចរក្នុងក្រៅ  ។

១០ ប្រាង្គថ្មបាក់ធ្លាក់       តែក្បាច់ចំលាក់              អត្ថន័យជ្រាលជ្រៅ

    រក្សាតំលៃ                  តដល់កូនចៅ                ផ្តាំរាល់ញាតិផៅ

                                   កុំធ្វេសនឹងលោភ  ។

១១ ប្រាង្គថ្មឯកភ្នំ           ញញឹមស្វាគមន៍             រំសាយចិត្តស្អប់

     កតញូខន្តី                វិន័យដូចម្លប់                 ក្បួនច្បាប់ជ្រាបសព្វ

                                   លើកយសដូនតា  ។

១២ ប្រាង្គថ្មទ្រព្យកេរ្តិ៍        ប្របស្ទឹងសង្កែ              សម្បត្តិអស្ចារ្យ

     ខេត្តបាត់តំបង           ពូជពង្សសាវតា             ផ្តាំអស់ខេមរា

                                    ថែឯកភ្នំផង      ៕     

        និពន្ធដោយវេជ្ជបណ្ឌិត  ញូង  ភក្តី ​  នៃមន្ទីរពេទ្យកុមារអង្គរ