តាំងចិត្តជារាស្រ្តល្អ បទពាក្យ៧ ០៧ ០៨ ២០១៣

១ តាំងចិត្តជាមនុស្សល្អឧត្តម         តាំងចិត្តជាភ្នំការពារខ្មែរ

   តាំងចិត្តជាមេឃជាភ្លៀងមេ         ផ្តល់ទឹកអោយខ្មែរធ្វើស្រែស្រូវ ។

២ តាំងចិត្តជាខ្យល់ផ្តល់ដង្ហើម        ប្រៀបដូចសន្សើមញញឹមនៅ

   ប្រស់ព្រំធម្មជាតិតាមរដូវ             បៃតងដងផ្លូវឧធ្យានអង្គរ ។

៣ តាំងចិត្តជាមនុស្សនាំសំណាង    ជោគជ័យយើងសាងពីចិត្តធម៌

   សុភមង្គលសប្បាយអរ               ស្រលាញ់ស្មោះសញាតិផងគ្នា ។

៤ តាំងចិត្តជាលាភយសសម្បត្តិ      តាំងចិត្តជាព្រ័ត្រស្រាក់ខេមរា

  សាមគ្គីចងរឹតស្មានិងស្មា              កំលាំងមហិមាឈ្នះសត្រូវ ។

៥ តាំងចិត្តជាខ្មែរស្រលាញ់ជាតិ       តាំងចិត្តជាញាតិផងជាប់ផ្លូវ

  តាំងចិត្តញញឹមជាប់និតនៅ          មិននាំហ្មងសៅដល់មាតុភូមិ ។

៦ តាំងចិត្តជាខ្មែរតស៊ូខ្លាំង              ទ្រូងដែកទល់ខ្មាំងយ៉ាងហានហំ

  តាំងចិត្តជាទ័ពតាមដងភ្នំ              មើលថែសមរភូមិព្រំសីមា ។

៧ តាំងចិត្តជាខ្មែរយុវជនល្អ            សាបព្រួសសីលធម៌ពុទ្ធសាសនា

  គន្លងច្បាប់ក្បួនខ្ពស់សាស្រ្តា         មាគ៌ាកម្ពុជាដ៏រុងរឿង ។

៨ តាំងចិត្តស្មោះស្ម័ក្រព្រះមហាក្សត្រ បល័ង្គសម្បត្តិជាតិនៃយើង

  គោរពរក្សាលើកដំកើង                កម្ពុជាខ្មែរថ្កើងអភិវឌ្ឍរាល់ថ្ងៃ ។

៩ តាំងចិត្តជាខ្មែរមិនក្បត់ខ្មែរ          ជាឆ្មាំមើលថែកេរ្តិ៍ជាតិថ្លាថ្លៃ

  តាំងប្រៀបទំពាំងស្នងឬស្សី          ដុសខាត់ប្រាជ្ញឆ្នៃយុវជនឆ្នើម ។

១០ តាំងចិត្តតាំងចិត្តពិតត្រងត្រាប់  ស្មាកៀកស្មាស្រាប់កំលាំងផ្តើម

  ដាស់តឿនកូនខ្មែរគ្រប់ដង្ហើម        ស្រលាញ់ក្សត្រយើងប្រៀបសង្ខារ ៕

       និពន្ធដោយវេជ្ជបណ្ឌិត ញូង ភក្តី មន្ទីរពេទ្យកុមារអង្គរ