កំណាព្យស្នេហាខកចិត្ត បទពាក្យ៨ ១៤ ១២ ២០១៣

បិទភ្នែកបើកភ្នែកឃើញតែមុខអូន

ស្នេហាពេញខ្លួននឹកស្ងួនរាល់ថ្ងៃ

ក្នុងចិត្តរែងគិតមនុស្សក្នុងហឬទ័យ

បេះដូងមមៃនឹកស្នាមញញឹម ។

បិទភ្នែកបើកភ្នែកឃើញតែភក្ត្រា

សំឡឹងកាលណាចិន្តាសង្ឃឹម

ទោះក្នុងជាតិនេះមិនបានក្រាបផ្ទឹម

ចិត្តដែលញញឹមស្មោះមិនប្រែឡើយ ។

ជាតិនេះមិនបានមើលថែមាសម៉ុម

ទប់ចិត្តទ្រាំយំទុក្ខធំគ្មានស្បើយ

ចិត្តដែលស្រលាញ់ហាក់គ្មានល្ហែរល្ហើយ

ចង់ប្រាប់ត្រានត្រើយទោះចំលើយទេ ។

ជាតិនេះត្រឹមជួបបានស្គាល់ពុំងា

គ្មានសិទ្ធរក្សាស្នេហាមាសមេ

ជាតិនេះត្រឹមផ្សងលួងលោមមើលថែ

សូមស្នេហ៍កើនទ្វេជួបគ្នាជាតិក្រោយ ។

បិទភ្នែកបើកភ្នែកអំរែកទុក្ខព្រួយ

ស្នេហ៍រំដួលមួយចិត្តស្រែកដង្ហោយ

ចង់ប្រាប់មាសស្ងួនបើអាចបែថយ

សុំអូនជាក្នើយជាគូរជីវិត ។

ជាតិនេះធ្វើម្តេចបានត្រឹមប៉ុណ្ណឹង

បានត្រឹមសញ្ជឹងសំឡឹងវមិត្ត

ថ្នមថែមើលថែនៅតែគ្មានសិទ្ធ

សូមម្ចាស់ដួងចិត្តជួបសុខរៀងអើយ ៕

រក្សាសិទ្ធដោយវេជ្ជបណ្ឌិត ញូង ភក្តី នៃមន្ទីរពេទ្យកុមារអង្គរ