ប្រាង្គព្រះវិហារជារបស់ខ្មែរ បទពាក្យ៨ ១១ ១១ ២០១៣

ប្រាង្គព្រះវិហារដ៏មហាស្កឹមស្កៃ

រួចផុតទុក្ខភ័យថ្ងៃទី ១១

ក្នុងខែវិច្ឆកាប្រាង្គផុតអស់ព្រួយ

ខ្មែររួមគ្នាជួយការពារតទៅ ។

ប្រាង្គព្រះវិហាររបស់ខ្មែរពិត

មិនអាចប្រឌិតតាមតែអ្នកក្រៅ

មិនអាចបន្លំមកគុសចារដៅ

យើងមានសំណៅច្បាប់ ICJ

១១ វិច្ឆិកា ២០១៣

សុភវិនិច្ឆ័យយុត្តិធម៌ម្ចាស់កេរ្តិ៍

ប្រាង្គព្រះវិហារជារបស់ខ្មែរ

មិនអាចកែប្រែតាមចិត្តបានឡើយ ។

េជ័យោ ជ័យោកម្ពុជាអច្ឆរិយៈ

ព្រះវិហារអមតៈផុតភ័យអស់ហើយ

យើងរូមអភិវឌ្ឍជួយខ្មែរអោយស្បើយ

ប្រាង្គព្រះវិហារអើយឈប់ព្រួយទៀតទៅ ។

ជ័យោ ជ័យោសកលយល់ច្បាស់

កម្ពុជាគឺម្ចាស់ប្រាង្គថ្មឥឡូវ

ផែនទីបារាំងបណ្តាំទុកនៅ

ដែនដីដងផ្លូវកម្មសិទ្ធិខេមរា ។

ប្រាង្គព្រះវិហារដ៏មហាសាល

សន្ធឹងវាតវាលហោះលើវេហា

ក្នុងចិត្តរំភើបរញ្ជួយឱរា

មើលមកកម្ពុជាដោយស្នាមញញឹម ។

ប្រាង្គព្រះវិហារល្បីល្បាញដោយឈ្មោះ

សាងលើភ្នំខ្ពស់ល្អគ្មានអ្វីផ្ទឹម

ក្បូរក្បាច់រចនាសែនស្រស់ប៉ប្រឹម

ប្រាង្គថ្មសង្ឃឹមផ្តាំខ្មែរកុំធ្វេស ។

ជ័យោ ជ័យោដែនដីសុវណ្ណភូមិ

ខ្ពង់រាបខ្នងភ្នំទេសភាពពិសេស

សមុទ្រឈើខ្មែរខ្មែរអើយត្រិះរិះ

មាតុភូមិតូចនេះមានសព្វធន់ធាន ។

ជ័យោ ជ័យោស្រែកហ៊ោព្រមគ្នា

កៀកស្មាស្រាក់ស្មាការពារអោយបាន

សម្បត្តិដូនតាគង់វង់ក្សេមក្សាន្ត

កលបុត្រគ្រប់ប្រាណចាំជាប់បេះដូង ។

និពន្ធដោយវេជ្ជបណ្ឌិត ញូង ភក្តី នៃមន្ទីរពេទ្យកុមារអង្គរ