អនុស្សាវរីយ៍មង្គលការមិត្តយើង បទកាគតិ ១៧ ១២ ២០១៣

១   ព្រលឹមស្រាងៗ          ក្រោកឡើងទៅហាង       តែងខ្លួនយ៉ាងស្អាត

    អ៊ុតសក់ផាត់មុខ         គ្មានស្នាមគ្រោតគ្រាត       ល្អទ្រង់ដល់បាត

                                    តាមប្រពៃណី  ។

២   គ្រប់គ្នាជួបជុំ             កន្លែងណាត់មុន            មិនយឺតនាទី

 ​​   នាំគ្នាឡើងឡាន          កំលោះនារី                    ស្ទុះស្ទាមូលមី

                                   ខ្លាចខកដំណើរ   ។

៣   គ្រប់គ្នារៀបរយ         ទាំងមុខទាំងក្រោយ         មើលក្រោមមើលលើ

    សម្ឋស្បល្អឯក           គាប់ភ្នែកឡើងស្លឺ             គយគន់សរសើរ

                                   មិនដាច់ពីមាត់    ។

៤  ក្នុងឡានរងំ               សំលេងកន្លង់                ឌឺដងប្រតិព័ទ្ធ

    គយគន់បុប្ឋា              ផ្លែផ្កាបែនបត់                តាមពណ៌សំពត់

                                   ម៉ូដអាវថ្លៃ ៗ   ។

៥   សំលេងរំពង             តន្រ្តីអូនបង                 ផ្គូរផ្គងនិស្ស័យ

     ក្នុងចិត្តបរិសុទ្ធ           មិត្តប្រុសមិត្តស្រី            ញញឹមប្រឹមប្រិយ

                                   សប្បាយកន្លង   ។

៦   រថយន្តលឿនលយ    មើលស្តាំមុខក្រោយ        ធម្មជាតិបំព្រង

     ចោលក្លិនបុប្ឋា          នាសាស្រូបត្រង            ក្លិនប្អូនក្លិនបង

                                   អប់ដងព្រឹក្សា    ។

៧   រថយន្តលឿនលយ    ផ្លូវមុខផ្លូវក្រោយ            រលកជលសា

     អារម្មណ៍ហោះហើរ      ទៅឋាននានា              ខ្លះពុលវោហារ

                                   ភ្លឺថ្លាគំនិត     ។

៨   ខ្លះនឹកទៅឆ្ងាយ         អារម្មណ៍រំពៃ               មើលមនុស្សកៀកកិត

     ខ្លះនឹកដល់គូរ            រអ៊ូអ្នកជិត                  ខ្លះទៀតផ្តេកផ្តិត

                                    នឹងមនុស្សនៅក្បែរ  ។

៩   ខ្លះទៀតសមរម្យ         អង្គុយសំងំ                នឹកគិតគូរស្នេហ៍

      ខ្លះសើចញញឹម         មានយំផងដែរ            ខ្លះក្អួតព្រោះតែ

                                    ពុលវោហារសាស្ត្រ   ។

១០  ឌឺដងសំដី               ខ្លះសើចសប្បាយ        ម្ខាងស្រីក៍ខ្មាស

       ផ្គូរផ្គងគ្នាលេង          ល្បែងខ្មែរចាស់ ៗ        មុខសក៍ផ្លាស់

                                    ក្រហមគួរក្នាញ់   ។

១១  រថយន្តលឿនលយ    រលាក់មុខក្រោយ        ក្រពះត្របាញ់

    រលករថយន្ត                រមូលពោះវេញ           ខ្លះពុលក្អួតចេញ

                                     ញុាំវិញថែមទៀត   ។

១២  រថយន្តលឿនលយ    រលាក់មុខក្រោយ       អង្គុយពយពៀត

     ត្រគាកប៉ះគ្នា              កាយាប្រជ្រៀត          ចិត្តវិញនឹកទៀត

                                     ឃ្លាតបៀតមិនបាន   ។

១៣  រថយន្តលឿនលយ    កាយមុនកាយក្រោយ  រកៀកគ្មានស្រាន្ត

      ក្រសោបចូលគ្នា         រលាខ្លួនប្រាណ         អ្នកខ្លះរុញច្រាណ

                                     ខ្លះសសៀរជិត   ។

១៤  ខ្លះក្អួតទន់ខ្លួន           ក្នុងចិត្តអង្រួន            ញ័រអស់គំនិត

     និយាយរអួល             ដេកដួលកៀកស្និត     ធម្មជាតិឆ្ងាយពិត

                                    ឃើញជិតបង្កើយ   ។

១៥  ខ្លះសខ្លាចខ្មៅ          ខ្លះប្រឹងខ្លាចផ្លូវ           រឹងខ្លួនដល់ហើយ

     ខ្លះគ្មានទុក្ខព្រួយ        សញ្ជឹងរំភើយ            ខ្លះក្អួតគ្មានស្បើយ

                                   រកតែគ្រែគេង   ។

១៦  អនុស្សាវរីយ៍             មង្គលការនារី            វក់វីក្រៃលេង

     ចុះពីថ្នល់ជាតិ            ចង្អៀតបែកផ្សែង        គោយន្តប្រឡែង

                                   ក្រលេងគ្មានឈប់  ។

១៧  ខ្លួនស្រាក់ចូលគ្នា     ពុលឡានផ្កាប់ផ្ងា       វេទនាលើសលប់

     ចិត្តវិញសប្បាយ         រីករាយគ្មានស្អប់         កាយញ័រចំប្រប់

                                    ដូចរាំឌីស្កូ   ។

១៨  ខ្លួនស្រាក់ចូលគ្នា      ទៅវិលវិញណា          ក្នុងចិត្តត្រេកអរ

    ក្រពះមូលពេញ           ផ្ទុកដោយអាហារ       ខ្លួនប្រាណប្រែជា

                                    អស់ក្លិនឈ្ងុយឈួល   ។

១៩  វិលវិញគោយន្ត        បានជិះរថយន្ត​           ចិត្តថាបានស្រួល

     ភាសាមិត្តភាព           រអាក់រអួល                 ឡានខូចទើរទួល

                                    អូសរុញព្រមគ្នា  ។

២០  មង្គលការជនបទ     សប្បាយប្រាកដ          ស្វាមីភរិយា

     ចូលរួមជួនពរ             ល្អដប់ប្រការ              យើងភ្ញៀវសូមលា

                                    ទាំងស្នាមញញឹម  ៕

រក្សាសិទ្ធដោយវេជ្ជបណ្ឌិត  ញូង  ភក្តី  នៃមន្ទីរពេទ្យកុមារអង្គរ

   

           ​