១ ភាសាបេះដូងតោងយកអារម្មណ៍
ដួងចិត្តខ្សិបផ្តាំតាមខ្សែរនេត្រា
មើលអូនញញឹមក្តុកក្តួលឱរា
ភាសាស្នេហាផ្ញើតាមកែវភ្នែក ។
២ ភាសាបេះដូងពីទ្រូងមនុស្សម្នាក់
ព្រោះស្នេហ៍វេញស្រាក់ស្រស់ស្រីល្អឯក
ស្ងួនដឹងខ្លួនហើយសូមកុំរារែក
មន្តស្នេហ៍កែវភ្នែកអោយនឹករាល់ថ្ងៃ ។
៣ បេះដូងគេងផ្សងលំអងផ្កាថ្ម
រំដួលអង្គររីកក្នុងហឬទ័យ
ជីវិតមួយនេះសូមរស់ក្បែរថ្លៃ
លោមថ្នមរូបស្រីមិនអោយហ្មងសៅ
។
៤ បេះដូងមានស្នេហ៍ប្រះប្រែមិនស្ងប់
លេងស្តាប់បង្គាប់នឹកតែឆោមឆ្លៅ
ផ្កាបាត់ដំបងជើងភ្នំសំពៅ
ចោលក្លិនជាប់នៅនាសារៀមបង
។
៥ ភាសាបេះដូងភាសាស្នេហា
ដោយមន្តភក្រ្តាញញឹមនួនល្អង
អោយចិត្តភ្លឹកភ្លាំងពេលជួបម្តងៗ
ព្រួញស្នេហ៍បេះដូងម្ចាស់វាសនាខ្ញុំ ។
៦ អង្គុយសំឡឹងសង្ឃឹមក្នុងចិត្ត
លូចពោលពាក្យពិតផ្ញើទៅមាសម៉ុម
ស្រលាញ់អូនណាស់ផ្កាស្រស់ក្រពុំ
ផ្កាអើយបងសុំមើលថែបានទេ ។
និពន្ធដោយវេជ្ជបណ្ឌិត ញូង ភក្តី កវីនៃមាតុភូមិបៃតង
No comments:
Post a Comment