កុំបីត្រាប់ឡើយ បទពាក្យ៧ ២៦ ១០ ២០១៣

១  កុំគិតថាខ្លាំងមានតែអញ    កុំបីទន្ទេញតែអួតអាង

ធ្វើមនុស្សមិនប្រើតែកំលាំង      កុំបីភាន់ភាំងព្រោះតល់ច្រក ។

២  កុំបីគិតខុសថាខ្លួនអស្ចារ្យ   គ្មានឡើយអ្នកណាច្រាលបង្កក

បុណ្យសក្តិមាសប្រាក់គ្រប់ច្រកល្ហក  បង្កអោយល្ហក់សណ្តានញាតិ ។

៣  កុំបីនាំខុសព្រោះអារម្មណ៍   កុំនាំទុក្ខធំគ្រោះដល់ជាតិ

កុំមានតែអញគ្មានគេទៀត       កុំបីចង្អៀតចិត្តនឹងជួយ. ។

៤  កុំបីរស់នៅនឹងការលោភ     កុំបីក្រសោបកាមាមួយ

គប្បីមានចិត្តទុក្ខនិងព្រួយ        កុំបីរលួយទាំងកិរិយា ។

៥  កុំបីកុហក់អោយខុសចិត្ត    កុំលក់គំនិតត្បិតពាលា

លើកប្រាជ្ញអោយខ្ពស់ឈ្មោះអ្នកជា  បញ្ញាវ័នខេមរាជាតិជាធំ ។

៦  កុំបីលើកខ្លួនខ្ពស់ហួសពេក     កុំដាក់ខ្លួនពេកខុសក្រិតក្រម

កុំបីប្រមាថមនុស្សចាស់ទុំ           ធ្វើចិត្តសមរម្យជាមនុស្សល្អ ។

៧  គួរដាក់ខ្លួនទាបសន្សំប្រាជ្ញ  កុំអាងអំណាចក្រោធបង្ក

កុំបីក្បត់ជាតិញាតិអ្នកក្រ      គួរសន្សំពរសុខក្សេមក្សាន្ត ។

និពន្ធដោយវេជ្ជបណ្ឌិត ញូង ភក្តី នៃមន្ទីរពេទ្យកុមារអង្គរ