កំណាព្យបើកចិត្តសួរចិត្ត បទពាក្យ៨ តាមបែបឆ្លងឆ្លើយ ១៤ ១១ ២០១៣

១ ភក្តីៈ អារម្មណ៍ក្តុកក្តួលឆួលឆាបបេះដូង    លាក់អូនក្នុងទ្រូងប្រកភ្នំដួងចិត្ត

ក្រែងក្លាចអូនដឹងខឹងនឹងបងពិត       ថ្លើមធំហ៊ានគិតស្រលាញ់ស្រស់ស្រី ។

២  ចិត្តមួយហាមឃាត់រុំពាត់វាចារ          ចិត្តមួយសួរថាម្តេចមិនប្រាប់ថ្លៃ

ទ្រាំលាក់ទាំងឈឺជំងឺនឹកស្រី            សុំចិត្តចរណៃយល់ចិត្តបងផង ។

៣ អ្នកស្រែៈ លួចលាក់ធ្វើអ្វីមិនស្ដីប្រាយប្រាប់        បញ្ជាក់រាយរ៉ាប់អំពីបំណង

ថាក្នុងដួងចិត្តស្មគ្រ័ស្នេហ៍នួនល្អង              ទោះបីខុសឆ្គងក៏បានធូរចិត្ត.

៤ ភក្តីៈ មិនថ្វីត្រង់ប្រាប់ពាក្យពេជ្រស្រលាញ់     តែខ្លាចទោម្នេញជ្រក់ជ្រិញខ្វល់ពិត 

អោយស្ងួនខ្វល់ខ្វាយនឿយណាយជីវិត         ខ្លាចចិត្តវមិត្តមិនត្រូវការរៀម  ។

៥​​ អ្នកស្រែៈ បើជ្រុលស្រលាញ់ទោម្នេញទ្វើអ្វី       សាកសួរចិត្តស្រីឲ្យដឹងច្បាស់ភ្លាម

ស្នេហ៍ឬមិនស្នេហគ្រាន់ជាងនៅស្ងៀម          កើតទុក្ខគ្រំក្រៀមម្នាក់ឯងឯកា   ។

៦ ភក្តីៈ នៅស្ងៀមស្ទាបស្ទង់មើលចិត្តមាសមុំ            មិនចង់បង្ខំបេះដូងស្ងួនភ្ញា

 មើលចិត្តស្រីសិនថ្លៃគិតយ៉ាងណា               ក្រែងពាក្យស្នេហាអោយផ្កាស្រពោន ។

៧ អ្នកស្រែៈ ស្ទាប់ស្ទង់ដល់ណាតិចថាស្ដាយក្រោយ   សួរនាងឲ្យហើយស្រួលប្រុងប្រៀបខ្លួន

បើសិននាងព្រមចែចូវតាមក្បូន                 ដណ្ដឹងស្រីស្ងួនទាន់ខែរងា....

៨ ភក្តីៈ ស្ទាបស្ទង់ដួងចិត្តស្មោះពិតមិនសូន្យ           ចែចូវតាមក្បួនជំនូនចៅមហា

 ចូលដល់ចាស់ទុំបង្គំទេវតា                     មាតាបិតាករុណាអភ័យ ។

៩  សូមអោយស្រីដឹងលំនឹងចិត្តស្មោះ              កុំបីបង់បោះអោយប្រុសរីងរៃ

សុំផ្លូវអូនដើរជណ្តើរផ្ទះថ្មី                        ដណ្តឹងកែវស្រីរៀបការតាមច្បាប់ ។

១០ ចិត្តនេះអាចទ្រាំរងចាំពេលហ្នឹង  លាក់អូនអូនដឹងស្ងៀមឈឹងមិនប្រាប់

កុំដាច់ចិត្តថ្វីបើថ្លៃមិនស្អប់       រៀបការស្របច្បាប់ស្វាមីភរិយា    ៕

និពន្ធដោយវេជ្ជបណ្ឌិត  ញូង  ភក្តី  និង អ្នក ស្រែ តាមបែបឆ្លងឆ្លើយ