កំណាព្យគិតខុស បទពាក្យ៨ ១១ ០១ ២០១៤

មនុស្សម្នាក់គិតខុសគ្មានទោសនឹងអោយ

ធ្វើហួសអាចធ្លោយគ្មានត្រើយនឹងបក

គិតខុសធ្វើត្រូវរស់នៅមិនខក

ឱនគ្រាប់ងើយស្កកសីលធម៍បណ្ឌិត ។

មនុស្សម្នាក់គិតត្រូវតែជ្រុលធ្វើខុស

កម្មតាមដោយទោសបាត់បង់គំនិត

វង្វេងលោភកាមបាត់យសដោយផិត

នាំអោយជីវិតជិតបរាជ័យ ។

មនុស្សម្នាក់គិតខុសព្រោះល្ងង់មួយគ្រា

អាចនាំវាសនាធ្លាក់ក្នុងអវចី

ត្រូវគិតអោយធួនតាំងខ្លួនអោយវៃ

គិតមួយពាន់ថ្ងៃស្រដីមួយផ្សង ។

មនុស្សម្នាក់គិតខុសរបួសសិបឆ្នាំ

ដឹងហើយសូមផ្តាំកុំមើលរំលង

កុំបីចចេសផ្កាប់មុខឌឺដង

កុំបីអោយឆ្គងសុជីវធម៌ខ្មែរ ។

មនុស្សម្នាក់គិតខុសអាចធ្វើបានត្រូវ

កុំងប់ល្ងង់ជ្រៅហួសផ្លូវអាចកែ

ចូរស្តាប់ទូន្មានទោះច្បាស់លើសគេ

ស្តាប់រួចរិះរេជ្រើសគំនិតល្អ ។

មនុស្សម្នាក់គិតត្រូវជ្រើសផ្លូវទាំងងោះ

ចង់ឈ្នះលើទោសជ្រុលហួសជំហរ

មិនអាចបកក្រោយដង្ហោយសុំពរ

អាក្រក់មកល្អដោយពរដេកចាំ ។

មនុស្សម្នាក់មិនអាចខុសហើយមិនកែ

មិនអាចបង្វែរអតីតដែលស្រាំ

កុំធ្វើអោយហួសក្បួនច្បាប់ញាតិផ្តាំ

កុំមើលបំណាំច្បាប់ក្រមលោកគិត ។

រក្សាសិទ្ធដោយវេជ្ជបណ្ឌិត ញូង ភក្តី នៃមន្ទីរពេទ្យកុមារអង្គរ