ញញឹមដើម្បីថ្ងៃល្អ បទកាគតិ ២៩ ០៥ ២០១៣

១   ញញឹមៗ    ​           ​ពេលព្រឹកព្រលឹម  ​       ស្វាគមន៍ញាតិមិត្ត

     ទឹកមុខរីករាយ       ​ ស្រស់ស្រាយក្នុងចិត្ត    នាំនូវជីវិត

                                សុភមង្គល  ។

២   ញញឹមថ្ងៃនេះ         សូមកើនចំណេះ         ប្រាជ្ញខ្ពស់ងាយយល់

      គំនិតកើនថ្មី           យសថ្លៃមានដល់         ជោគជ័យភោគផល

                                 មង្គលបរិបូរណ៍  ។

២   ញញឹមថ្ងៃថ្មី           សិរីសួស្តី                   សូមសុខពេញពោរ  

     បងប្អូនកូនចៅ        ស្មារតីថ្លៃថ្នូរ               ប្រាថ្នាមកយូរ

                                 ទុកជូនគ្រួសារ  ។

៤   ញញឹមថ្ងៃស្អែក       ផ្តាំតាមកែវភ្នែក           ក្នុងចិត្តរាបសារ

     ស្វាគមន៍ថ្ងៃថ្មី          ជីវិតថ្លៃថ្លា                 ថ្ងៃនេះធ្វើការ

                                 ដើម្បីស្អែកល្អ   ។

៥   ញញឹមភ័ក្រ្តា          មេត្តាករុណា               ដោយចិត្តបវរ

     សូមសុខសួស្តី       ​ នាំជ័យដោយធម៌        សូមអោយមនុស្សល្អ

                                ឃុំគ្រងជានិច្ច   ។

៦   ញញឹមបេះដូង       ចិត្តស្ងប់ក្នុងទ្រូង         តាមបុណ្យកុំភ្លេច

     កោសល្យប្រាជ្ញវៃ      ន័យយសដូចពេជ្រ      ធម៌ល្អរំលេច

                                លាភទ្រព្យថ្លៃថ្នូរ   ។

៧   ញញឹមវាចារ         មង្គលគ្រួសារ              គ្មានអ្វីអាចប្តូរ

     ថ្ងៃនេះថ្ងៃស្អែក       លាភសុខបរិបូរណ៍       សម្បត្តិហៀរហូរ

                               ដោយស្នាមញញឹម  ៕      

           និពន្ធដោយវេជ្ជបណ្ឌិត  ញូង  ភក្តី  នៃមន្ទីរពេទ្យកុមារអង្គរ