១ ព្រះអាទិត្យអើត ឆ្លងព្រៃខាងកើត មើលមកកម្ពុជា
ពន្លឺស្រទន់ ឆ្លងភ្នំព្រឹក្សា ផ្តាំអស់ខេមរា
កុំបីភ្លេចជាតិ ។
២ ព្រះអាទិត្យអើត យើងខ្មែរយើងកើត ជាខ្មែរម្តងទៀត
យើងត្រូវតាំងខ្លួន មាំមួននឹងមាឌ កលបុត្រខេមមាតុ
យុវជនគំរូ ។
៣ យើងខ្មែរខេមរា លត់ដំចរិយា សិក្សាតស៊ូ
រៀនយប់រៀនថ្ងៃ លកលៃផ្លាស់ប្តូរ យកប្រាជ្ញគុណគូរ
មើលជាតិជាធំ ។
៤ យើងខ្មែរខេមរា កើតមកកាលណា ប្រាជ្ញាឧត្តម
ស្រលាញ់ញាតិផៅ សណ្តានផងភូមិ យើងរស់សុខដុម
មង្គលថ្លៃយស ។
៥ យើងខ្មែរខេមរា តាំងពីកុមារ ស្គាល់គុណស្គាល់ទោស
គោរពចាស់ទុំ រៀនក្រមក្បួនខ្ពស់ ប្រឹងយកអោយអស់
ដោយទ្រព្យបញ្ញា ។
៦ យើងត្រូវអប់រំ មើលជាតិជាធំ ស្មើនឹងសង្ខារ
រៀនអោយពូកែ ឆ្លាតវៃគ្រប់គ្នា ស្ម័ក្រខ្លួនការពារ
មាតុភូមិបៃតង ។
៧ យើងកើតមកម្នាក់ ស្មាយើងកៀកស្រាក់ វេញជាចំណង
ផ្តាំហើយផ្តាំទៀត កុំមើលរំលង កុំបីបោះបង់
មាក់ងាយជាតិឯង ។
៨ យើងកើតមកហើយ កូនខ្មែរល្អអើយ កុំបីបែកឆ្វេង
កុំភ្លេចសារធាតុ ញាតិផងកុំក្លែង កុំលើកជាតិផ្សេង
ខ្ពស់ហួសជាតិខ្លួន ។
៩ យើងកើតមកល្អ កលបុត្រមហានគរ ក្លាំងក្លាហំហួន
សសរទ្រូងជាតិ ធម្មជាតិបងប្អូន កុំបីរុគគួន
រួបរួមអភិវឌ្ឍន៍ ។
១០ យើងកើតមានក្រ ទោះបីខ្មៅស ក្រុងស្រែជនបទ
កុំបីរើសអើង ខ្ពើមឆ្អើមមុខមាត់ យើងផ្សងរស់ផុត
ជ្រោះកម្មមនុស្សា ។
១១ យើងកើតជាខ្មែរ
សម្បត្តិទ្រព្យកេរ្តិ៍ យើងត្រូវរក្សា
ប្រាង្គប្រាសាទថ្ម វប្បធម៌ខេមរា តាំងចិត្តប្តេជ្ញា
ការពារអោយគង់ ។
១២ តាំងចិត្តជាឆ្មាំ
ទ្រូងក្រាស់ហើយមាំ និស្ស័យជាហង្ស
មើលជាតិសាសនា ព្រះមហាក្សត្រហ្លួង ប្រជាក្រៅក្នុង
សសរទ្រូងខ្មែរ ។
១៣ តាំងចិត្តជាមនុស្ស
ឈាមជ័រអ្នកស្មោះ ប្រុសស្រីកូនម៉ែ
សសរទ្រូងជាតិ រឹងមាំលើសគេ ច្បាំងមិនងាករេ
ពេលជាតិត្រូវការ ។
១៤ សមរភូមិប្រយុទ្ធ
គង់ថ្វីមិនស្លុត ស្លាប់សូន្យសង្ខារ
តែបើបាត់ជាតិ បាត់បង់សាសនា ជាតិត្រូវមរណា
គ្មានថ្ងៃវិលឡើយ ។
១៥ សមរភូមិដឹកនាំ
អោយជាតិរឹងមាំ ទៅមុខរៀងអើយ
សមរភូមិអភិវឌ្ឃន៍ កសាងទៅហើយ ប្រជាបានស្បើយ
ក្នុងសន្តិភាព ៕
និពន្ធដោយវេជ្ជបណ្ឌិត ញូង ភក្តី នៃមន្ទីរពេទ្យកុមារអង្គរ
No comments:
Post a Comment