កំណាព្យចិត្តខ្មែរ បទពាក្យ៨ ០៤ ០១ ២០១៤

យើងស្លាប់មែនពិតតែចិត្តយើងរស់

ប្តេជ្ញាស្ម័ក្រស្មោះដាស់អស់កលបុត្រ

យើងស្រលាញ់ខ្មែរយើងក្រោកប្រយុទ្ធ

ខ្មែរអើយកុំស្លុតត្រូវក្លាហានឡើង ។

យើងស្លាប់មែនពិតគំនិតស្រែកហៅ

ញាតិផងក្នុងក្រៅដែលនៅត្រុវដឹង

អប់រំកូនខ្មែរអោយខ្លាំងហើយប្រឹង

ទោះជាព្រលឹងក៏កុំភ្លេចខ្មែរ ។

យើងស្លាប់មែនពិតអោយជាតិយើងរស់

យើងស្លាប់ទុកឈ្មោះកិត្តិយសជាកេរ្តិ៍

កុំស្លាប់អសោចខ្មែរដៀលខ្មែរជេរ

ជាតិយើងឋិតថេរព្រោះខ្មែររួមគ្នា ។

យើងស្លាប់មែនពិតសូមជាតិយើងរស់

ខ្មែរមានកិត្តិយសល្បីល្បាញលោកា

តាំងចិត្តអោយមាំកៀកស្មាការពារ

ទុកឈ្មោះនិងងារអ្នកស្នេហាជាតិ ។

យើងស្លាប់យើងកើតយើងការពារខ្មែរ

យើងការពារកេរ្តិ៍សម្បត្តិភូមិមាតុ

ដែនដីត្បូងពេជ្រព្រឹក្សព្រៃធម្មជាតិ

ផ្តាំហើយផ្តាំទៀតកុំធ្វេសនឹងមារ ៕

រក្សាសិទ្ធដោយវេជ្ជបណ្ឌិត ញូង ភក្តី នៃមន្ទីរពេទ្យកុមារអង្គរ