បឹងអនុស្សាវរីយ៍១០ភូមិ បទពាក្យ៨ ៣០ ០៧ ២០១៣

១  ថ្ងៃជ្រេទេរទៅចិត្តនៅរលឹក                    ច្រើនយប់ល្ងាចព្រឹកនឹកគ្រាកន្លង

   ១០ឆ្នាំហួសហើយនៅឡើយគេងផ្សង     មកជួបលេងម្តងដាមអនុស្សាវរីយ៍   ។

២  ថ្ងៃជ្រេហួសទៅចិត្តនៅស្រណោះ          ដែនដីល្អស្រស់សម្ឋស្សប្រថពី  

    នឹកវ័យកុមារនឹកគ្រប់នាទី                    ស្រមៃមមៃនៅតែនឹងភ្នែក   ។

៣  ផ្ទៃបឹងល្វឹងល្វើយកល់កើយខ្នងភ្នំ          ទំនប់ខ្ពស់ធំបណ្តោយជើងមេឃ

    ស្ពានថ្មភ្ជាប់បឹងឈរទ្រេឹងអល់ឯក          ស្ពានស្រក់ទឹកភ្នែកស្តាយអាងធម្មជាតិ  ។

៤  ផ្ទៃបឹងល្វឹងល្វើយដោយខ្សែរទឹកហូរ        វាលស្រែគ្វាលគោគោសុីស្មៅព្រាត

    ជួបជុំបងប្អូនក្នុងភូមិជាញាតិ                ពេលមកម្តងទៀតធម្មជាតិប្រែអស់   ។

៥  នឹកគិតដល់មិត្តមិត្តក៍ឃ្លាតឆ្ងាយ          នឹកម្លប់ឬស្សីសល់នៅតែឈ្មោះ

   នឹកគ្រាបាចត្រីបៀបឹងរីងខ្សោះ               កក់ស្មៅជំនួសផ្ទៃទឹកល្ហល្ហេវ   ។

៦  នឹកបឹងធំធេងទឹកមិនដែលស្រក           ឯនាយភ្នំថ្នក់ជំរកទូកចែវ

    ទូកជិះលើកមងសន្ទូចបឹងខៀវ              ឥឡូវចង់រាវចាប់ត្រីក៍គ្មាន   ។

៧  បឹងធំទឹកច្រើនត្រីក៍មានច្រើន               ឥឡូវស្មៅកើនបឹងរាក់បាតលាន

    ឱបឹងកំសត់ព្រាត់ឆ្ងាយញាតិញាណ       ធ្លាប់នេសាទបានចិញ្ចឹមគ្រួសារ  ។

៨  បឹងស្រស់ត្រកាលក្រាលទឹកគ្របប្រាណ  ធ្លាប់ងូតកំសាន្តមិត្តៗកុមារ

   ហែលប្រដេញលេងបែកផ្សែងជលសារ     បឹងអនុស្សាទឹកថ្លាដល់ដី    ។

៩  អនុស្សារីយ៍បឹងធំនៃញាតិ                    បឹងស្រស់ធម្មជាតិរោយស្វិតអស់ន័យ 

   ធ្លាប់ជាដែនទឹកជំរកអស់ត្រី                   ឥឡូវបឹងក្ស័យក្លាយជាបឹងស្មៅ   ។

១០ ម្ចាស់បឹងមមៃសែននឹកជលសារ         សង្ឃឹមរដ្ឋាជួយស្តាអោយជ្រៅ

   ប្រយោជន៍ដល់រាស្រ្ត១០ភូមិរស់នៅ       ស្តាហើយយើងហៅបឹងអនុស្សាវរយ៍  ៕

     និពន្ធដោយវេជ្ជបណ្ឌិត  ញូង  ភក្តី   នៃមន្ទីរពេទ្យកុមារអង្គរ