កង្វល់មាតុភូមិខ្ញុំ បទពាក្យ៨​​​​ ២០ ០៦ ២០១៣

១  មាតុភូមិកម្ពុជាដ៏សំបូរណ៍អើយ          ថ្ងៃស្អែកថ្ងៃក្រោយទៅជាយ៉ាងណា

   ថ្ងៃនេះមានទុក្ខផ្តុំពេញឱរ៉ា                   បារម្មណ៍ខេមរាទុរ្ភិក្សជីវិត   ។

២  មាតុភូមិកម្ពុជាដ៏សំបូរណ៍អើយ         ធម្មជាតិឆ្លងឆ្លើយប្រាប់ទុក្ខក្នុងចិត្ត

   បារម្មណ៍ខ្លាចមនុស្សបំផ្លាញគ្មានគិត    ព្រៃធំខ្លឹមពិតដួលដេករាល់ថ្ងៃ  ។

៣  មាតុភូមិកម្ពុជាដ៏សំបូរណ៍អើយ         ភ្លៀងមិនទៀងឡើយស្ងួតប្រេះខូងដី

   ភ្លើងផ្គររន្ទះកាចណាស់ប្រល័យ           ព្យុះប៉ើងបាត់ព្រៃជាវាលរហោឋាន ។

៤  មាតុភូមិកម្ពុជាដ៏សំបូរណ៍អើយ         ដីស្ងួតខ្ពស់ហើយស្ងួតចិត្តក្សេមក្សាន្ត

   គោករីងអូរស្ទឹងបឹងទន្លេមាន               ជលផលប៉ុន្មានថមថយរាល់ឆ្នាំ   ។

៥  មាតុភូមិកម្ពុជាដ៏សំបូរណ៍អើយ         ​ទុក្ខផ្តុំគ្មានស្បើយក្នុងចិត្តតែងផ្តាំ

   សម្បត្តិវប្បធម៌ខ្មែរល្អលំនាំ                 អាចជួយចិញ្ចឹមខ្មែររស់យ៉ាងស្រួល  ។

៦  មាតុភូមិកម្ពុជាដ៏សំបូរណ៍អើយ        ទ្រព្យនៅបង្កើយម្តេចឡើយប្រែប្រួល

   មាសពេជ្រត្បូងថ្មព្រៃក្រាស់ភ្នំទួល       អន្តរាយដេកដួលគួរអាសូរណាស់  ។

៧  មាតុភូមិកម្ពុជាដ៏សំបូរណ៍អើយ       ថ្ងៃស្អែកដល់ហើយទំលាប់នៅចាស់

 សម្បត្តិមហាសាលផ្តាំខ្មែរអោយផ្លាស់   មើលកេរ្តិ៍អោយច្បាស់តំលៃជាតិឯង  ។

៨  មាតុភូមិកម្ពុជាដ៏សំបូរណ៍អើយ        កាលណាខ្មែរស្បើយលោភលន់វង្វេង

  មើលជាតិជាធំសង្គមប្រាជ្ញស្តែង          បេះដូងយើងស្វែងស្ទួយភាពថ្កើងថ្កាន ។

៩  មាតុភូមិកម្ពុជាសែនសំបូរណ៍ណាស់  ដែនកោះដេដាសទេសភាពទេវឋាន

   ផ្តាំខ្មែរអោយខំអភិវឌ្ឍន៍ឧធ្យាន          ទេសចររយលានកំសាន្តគាប់ភ្នែក  ។

១០ មាតុភូមិកម្ពុជាតូចតែឧត្តម            ផ្តាំខ្មែរកុំយំកៀកស្មាហើយស្រែក

   យើងការពារជាតិស្ទួយឡើងគ្រប់ផ្នែក  មិនមើលនឹងភ្នែកមុនជាតិលិចលង់ ៕

      និពន្ធដោយវេជ្ជបណ្ឌិត  ញូង  ភក្តី  នៃមន្ទីរពេទ្យកុមារអង្គរ