ថ្ងៃមង្គលសួរស្តី បទពាក្យ៨ ១៧ ០៧ ២០១៣



១  ថ្ងៃអង្គារពុធទេវបុត្រមង្គល          មេបាលោកកលចៅមហាប្រុសស្រី



   ផ្សំផ្គុំចងស្រាក់ពរជ័យសួរស្តី         សេងហាប់ពិសីជាគូរភរិយា ។



២  ថ្ងៃអង្គារពុធជុំមិត្តបងប្អូន           ពពាក់ពពូនដោយពរផ្កាស្លា

   

អ៊ុំពូតាយាយមាតាបិតា               វេញខ្សែរវាសនាបុត្រាបុត្រី    ។


៣  ថ្ងៃមង្គលល្អបវរក្រៃណាស់         បុត្រទ្វេសំពះទេវតាម្ចាស់ដី

   ជួយដឹងជួយលឺភរិយាស្វាមី         សុំគ្នាជាប្តីប្រពន្ធស្របច្បាប់   ។

៤  ថ្ងៃមង្គលជ័យវិថីជីវិត                 ក្តុកក្តួលដួងចិត្តពិសីសេងហាប់

   គ្រឿងបណ្ណាការត្បូងពេជ្រជូនផ្គាប់  តាមដោយទំលាប់ប្រពៃណីខ្មែរ  ។

៥  ថ្ងៃមង្គលជ័យសិរីសួរស្តី            លាភយសទ្រព្យថ្មីចូលមកហូរហែរ

   ទ្រព្យចាស់គង់នៅពូនគរជាកេរ្តិ៍     ដោយគុណពុកម៉ែតាមថែរក្សា  ។

៦  ថ្ងៃមង្គលជ័យចាំន័យទេវពរ        ញាតិមិត្តអបអរពាក្យពេជ្រថ្លៃថ្លា

   សូមកូនទាំងពីរចេះស្រលាញ់គ្នា   មេត្តាករុណាដល់ចាស់កោងខ្នង ។

៧  ថ្ងៃមង្គលជ័យអស់ភ័យទាំងពួង   សត្រូវបួងសួងជាមិត្តញាតិម្តង

 ឧបសគ្គទាំងឡាយរលាយអស់ហ្មង  សូមគ្រោះរំលងជួបសុខរាល់ថ្ងៃ  ។

៨  ថ្ងៃជ័យមង្គលមានដល់គ្រួសារ     ឆាប់មានបុត្រភ្ញាក្លាហានវាងវៃ

  តាមដោយគន្លងធម៌ឪពុកម្តាយ      ពរសុខសួរស្តីឥតបីឃ្លាតឡើយ  ។

៩  ថ្ងៃជ័យមង្គលដោយផលចិត្តស្មោះ ពរភ្ញៀវកិត្តិយសខ្ពស់វែងគ្មានត្រើយ

  ជាពរអមតៈក្នុងចិត្តអ្នកហើយ        សូមចាំកុំស្បើយកើតចិត្តធញ់ទ្រាន់ ។

១០ ថ្ងៃមង្គលជ័យសិរីសួរស្តី           ដល់កូនប្រុសស្រីបរិបូរណ៍គ្រប់គ្រាន់

  រកសុីមានបានត្រជាក់ត្រជុំ            មើលថែគ្រងឃុំគ្រួសាររៀងអើយ  ៕

   និពន្ធដោយវេជ្ជបណ្ឌិត  ញូង  ភក្តី  នៃមន្ទីរពេទ្យកុមារអង្គរ