ក្រោមផ្ទៃមេឃស្រស់ខៀវខ្ចីស្រងាត់
ប្រាង្គអង្គរវត្តដ៏ល្អអស្ចារ្យ
បង្ហាញវត្តមាននៅលើលោកា
កម្មសិទ្ធខេមរានៃមាតុភូមិខ្មែរ ។
ក្រោមមេឃមួយនេះយើងមិនគួរភ្លេច
អង្គរត្បូងពេជ្ររំលេចមន្តស្នេហ៍
កំពូលទាំងប្រាំផ្តាំរាស្ត្រកុំរេ
កុំក្បត់កលកែយើងខ្មែរតែមួយ ។
ក្រោមមេឃខៀវស្រស់ខុសហួសតែពេល
កាលនោះដំណែលខ្មែររួមចេះជួយ
ប្រាង្គថ្មសាក្សីខ្មែរមុនខ្មែរក្រោយ
កុំបីនឹងធ្លោយអោយចាញ់ប្រៀបគេ ។
ក្រោមមេឃមួយពិតជីវិតផ្សេងគ្នា
យើងចេះពណ៌នាចេះជួយអស់ខ្មែរ
ចេះរួមសុខទុក្ខអភិវឌ្ឍឡើងទ្វេ
ប្រាង្គថ្មផ្តាំខ្មែរកុំភ្លេចជាតិសាសន៍ ៕
និពន្ធដោយវេជ្ជបណ្ឌិត ញូង ភក្តី នៃមន្ទីរពេទ្យកុមារអង្គរ
No comments:
Post a Comment