ទេសចរគ្រួសារតាមភ្នំខ្ពង់រាប បទពាក្យ៨ ៣១ ០៨ ២០១៣

 ១  ទិដ្ឋភាពត្រកាលនាយខ្នងភ្នំព្រឹក          សន្សើមពេលព្រឹកប្រស់ព្រំបុប្ឋា

   ទេសចរធម្មជាតិគយគន់ព្រឹក្សា              ជាយដែនកម្ពុជាមាតុភូមិនៃយើង ។

២  ទិដ្ឋភាពបំព្រងតាមដងអូរស្ទឹង             បេះដូងសញ្ជឹងសំលឹងងើយឡើង

   ព្រឹក្សព្រៃបៃតងលិចកើតត្បូងជើង           ស្រុកភូមិថ្កានថ្កើងអភិវឌ្ឍទៅមុខ ។

៣  ទេសចរគ្រួសាររមនាដួងចិត្ត               នាំអោយជីវិតដាមដិតក្តីសុខ

   មើលភ្នំខ្ពស់ទាបខ្ពង់រាបព្រៃស្តុក            ឆ្ងាយភ្នំសន្ទុកដែនដីបាត់ដំបង  ។

៤  ទេសចរគ្រួសារទស្សនាទេសភាព        លើខ្នងភ្នំយ៉ាតជំនោរជ្រោះជ្រង

   បក្សាបក្សីម្រឹគព្រៃត្រសង                    ច្រៀងលេងឌឺដងឡកឡើយអោយគ្នា  ។

៥  ទេសចរគ្រួសារទស្សនាទេសភាព        ឆ្លងខេត្តសៀមរាបគយគន់បុព្វតា

   ទឹកដីត្បូងពេជ្រប៉ៃលិនគុជ្ជសា              ផ្នូរស្នេហ៍ពសុធាចៅចិត្តឃុនរី  ។

៦  ទេសចរគ្រួសារទស្សនាដងអូរ             គយគន់ទឹកហូរច្រោះកាត់ប្រថពី

   កំសាន្តទេសភាពភ្នំខៀវមូលមី              ភ្នំច្រើនសាមគ្គីឧធ្យានធម្មជាតិ  ។

៧  ទេសចរញញឹមស្រស់ស្រាយក្នុងចិត្ត   វិលវល់នែបនិតទេសភាពផ្សេងទៀត

    មើលតាមដងផ្លូវចំការខេមញាតិ          កាង៉ែនមៀនទៀបធុរែនសៅម៉ៅ   ។

៨  មើលចុះមើលឡើងផ្គើនផ្លុងអារម្មណ៍   ដែនដីសុវណ្ណភូមិខ្ពង់រាបព្រៃជ្រៅ

    ដូចឋិតនាឋានសន្តិភាពភពក្រៅ         ផ្លុងអារម្មណ៍ទៅសួគ៌ឋានរមនា  ។

៩  កំសាន្តជ្រោះជ្រងអណ្តូងត្បូងពេជ្រ      ប៉ៃលិនកុំភ្លេចសម្បត្តិខេមរា

    រមណីយដ្ឋានស្អាតនាំជាតិថ្លៃថ្លា          ខ្មែរអើយរក្សាអភិរក្សអោយគង់  ។

១០ ទេសចរគ្រួសារពរនាទេសភាព         ផ្តាំខ្មែរដ៏រាបកុំអោយខ្មែរល្ងង់

   កៀកស្មាកសាងអភិវឌ្ឍយូរលង់          ខ្មែរអើយបោះបង់គំនិតលោភលន់  ៕

      និពន្ធដោយវេជ្ជបណ្ឌិត  ញូង  ភក្តី    នៃមន្ទីរពេទ្យកុមារអង្គរ