កំណាព្យឃាត់ចិត្ត បទពាក្យ៨ ២២ ១០ ២០១៣

ព្រោះចិត្តស្រលាញ់នឹកក្នាញ់នួនល្អង 

ព្រោះចិត្តគេងផ្សងមូរហ្មងរាល់ថ្ងៃ

សុំតែបានឃើញមាសស្ងួនរីករាយ

នឹកគិតមមៃភ័ក្រស្រីញញឹម   ។

ព្រោះចិត្តមើលឃើញថារូបអូនល្អ

ប្រៀបនឹងអប្សរទេពស្រស់ប៉ប្រឹម

បេះដូងមួយនេះតែងគិតសង្ឃឹម

ទោះបីបើដឹងថាគ្មានវាសនា   ។

ព្រោះចិត្តមួយនេះតែងត្រិះរិះខុស

ព្រោះលោភលន់ហួសព្រំដែននេត្រា

ឃើញហើយមិនអាចឃាត់ចិត្តប្រាថ្នា

លាក់ស្រស់ពុំងារពេញហៀរបេះដូង  ។

ព្រោះចិត្តឃាត់ចិត្តមួយនេះមិនបាន

ឃើញស្រស់កល្យានរញ្ជួយញ័រទ្រូង

សំលេងដុកដាក់តន្រ្តីលោមលួង

ក្នុងបេះដូងបងរត់ទៅរត់មក  ។

ព្រោះចិត្តស្រលាញ់ក្នក់ក្នាញ់កែវស្រី

ត្រឹមឃើញរូបថ្លៃក៍អស់ទុក្ខសោក

ជូនពរដល់ស្ងួនតទៅថ្ងៃមុខ

ស្រស់ស្អាតរហូតកុំបីបាត់បង់  ។

ព្រោះសុំត្រឹមមិត្តហៅចិត្តវិលវិញ

កុំបីស្រលាញ់ក្រែងកែវមូរហ្មង

អូនខឹងអូនស្អប់លែងរាប់រកបង

ស៊ូរស្នេហ៍សូន្យបង់សូមគង់ត្រឹមមិត្ត  ៕

និពន្ធដោយវេជ្ជបណ្ឌិត  ញូង  ភក្តី​  នៃមន្ទីរពេទ្យកុមារអង្គរ