អរគុណគ្រូពេទ្យបេះដូង បទពាក្យ៨ ០៦ ១២ ២០១៣

អរគុណខ្លាំងណាស់អរគុណអនេក

អរគុណគ្រូពេទ្យវះកាត់បេះដូង

វេជ្ជបណ្ឌិតមនុស្សធម៌ពេញទ្រូង

ប្រៀបទេវតាហ្លួងសង្រ្គោះជីវិត ។

អរគុណមនុស្សល្អដោយធម៌មេត្តា

លោក VIOLA វេជ្ជបណ្ឌិត

លោក STEPANO ឧត្តមគំនិត

នឹងក្រុមជំនិតគ្រូពេទ្យជំនាញ ។

អរគុណគ្រូពេទ្យមានចិត្តមនុស្សធម៌

កុមារអង្គរមន្ទីរពេទ្យក្រាញ

ព្យាយាមព្យាបាលមិនដែលចុះចាញ់

មិនដែលទោម្នេញនឹងការនឿយហត់ ។

អរគុណគ្រូពេទ្យស្ម័ក្រចិត្តមនុស្សធម៌

កូនខ្មែរជូនពរល្អគ្មានកំណត់

សូមអោយជោគជ័យកិត្តិយសបំផុត

សូមមនុស្សក្នុងលោកតាមជួយការពារ ។

អរគុណគ្រូពេទ្យកម្ពុជាដ៏ឆ្នើម

ដែលផ្តល់ដង្ហើមខ្មែរផុតវេទនា

ផុតទារុណកម្មដ៏សែនពើតផ្សា

ពរបួនប្រការចូរមានដល់អ្នក ។

អរគុណខ្លាំងណាស់លោក សរ វុទ្ធី

លោក ប៊ុនរ៉ុម លី សណ្តំថ្នាំម្នាក់

អរគុណ ចិន្តា សែម សែនប្រចក្ស

អរគុណគ្រប់ថ្នាក់បុគ្គលិកដ៏ល្អ ។

អរគុណគ្រូពេទ្យបរទេសតែងជួយ

តែងផ្តល់ជំនួយកុមារអង្គរ

មន្ទីរពេទ្យយើងតាំងចិត្តបវរ

តាមក្រមសីលធម៌គ្រូពេទ្យបេះដូង ៕

និពន្ធដោយវេជ្ជបណ្ឌិត ញូង ភក្តី នៃមន្ទីរពេទ្យកុមារអង្គរ