ក្នើយស្នេហ៍ក្បែរទ្រូង បទពាក្យ៨ ០៩ ១១ ២០១៣

អង្គុយសំឡឹងទន្ទឹមមុខមុំ

មើលភ័ក្រស្រទំស្រទន់មន្តស្នេហ៍

ញញឹមសែនស្រស់ជានារីខ្មែរ

ថ្ពាល់ខួចទាំងទ្វេមន្តស្នេហ៍បេះដូង ។

សំឡឹងសំឡក់ខ្និកខ្នក់គួរក្នាញ់

បេះដូងផ្តើមវេញលាក់ថ្លៃក្នុងទ្រូង

សំឡឹងកែវភ្នែកថ្លាមុតចិត្តចិត្តផ្សង

មើលស្រស់នួនល្អងផ្តិតរូបឆោមឆាយ ។

សំឡក់សំឡឹងញញឹមរកគ្នា

ភាសានេត្រារៀបរាប់ហឬទ័យ

ចង់ផ្តើមពាក្យស្នេហ៍សាសងនឹងស្រី

ពាក្យពេជ្រសំដីហាក់មិនដូចចិត្ត ។

ក្នុងចិត្តញាប់ញ័រនៅមិនស្ងប់ស្ងៀម

បេះដូងគំរៀមចង់ប្រាប់វមិត្ត

ភាសាស្នេហាស្មោះត្រង់មួយពិត

អារម្មណ៍នេះគិតខ្លាចក្រែងស្រីខឹង ។

ក្នុងចិត្តស្រលាញ់មិនហ៊ាននិយាយ

បេះដូងលោតវាយដួងចិត្តមិននឹង

ធ្វើនេះធ្វើនោះមើលទៅហាក់ដឹង

សារភាពពេកហ្នឹងសមរម្យរឺស្ងួន ។

ក្នុងចិត្តហាក់ចង់អង្គុយក្បែរពៅ

ក្បែរកាយឆោមឆ្លៅប្រែរឹងអស់ខ្លួន

ហាស្តីមិនរួចភ្លឹកភ្លាំងគាំងជួន

មើលចំរូបអូនត្រជាក់កាយា ។

ក្នុងចិត្តក្តុកក្តួលឆួលឆាបព្រលឹង

ស្ងៀមស្ងាត់មាត់ឈឹងមិនដឹងពេលណា

ក្រសោបកាយស្រីថ្នមបីពុំងា

កេសាលើស្មារាត្រីរនោច ។

ស្មាមួយជាក្នើយស្ងួនកើយអោយស្កប់

សូមអូនកុំស្អប់បងច្រៀងបងហួច

បំពេរថ្លើមថ្លៃមមៃលបលួច

ថ្នមចិត្តស្រីតូចមិនអោយហ្មងសៅ ។

ស្មាបងជាក្នើយកើយផ្អែកទ្រូងរៀម

ខ្យល់បោកចិត្តស្ងៀមអោបកាយឆោមឆ្លៅ

ជាតិនេះផ្ញើខ្លួនតូចតន់ពាលពៅ

ជាតិនេះរស់នៅមានអូននិងបង ។

ជាតិនេះសូមចិត្តនឹមនួនប្រណី

កុំផ្តាច់និស្ស័យជ្រើសគេនួនល្អង

ប្រាថ្នារួមរស់ដល់ចាស់កោងខ្នង

សូមបើកបេះដូងជ្រើសបងបានទេ ។

និពន្ធដោយវេជ្ចបណ្ឌិត ញូង ភក្តី នៃមន្ទីរពេទ្យកុមារអង្គរ